Bhavnagar: રાજ્યકક્ષાની બેડમિન્ટન ટૂર્ના.નો પ્રારંભઃ 150 ખેલાડીઓ વચ્ચે જંગ

શહેરના સિદસર રોડ પર આવેલ સ્પોર્ટસ ઓથોરિટી ઓફ ગુજરાત સંચાલિત સ્પોર્ટ્સ કોમ્પ્લેક્ષ ખાતે આજથી સતત ચાર દિવસ માટે ગુજરાત સ્ટેટ રેન્કિંગ બેડમિન્ટન ટૂર્નામેન્ટનું આયોજન થયું છે.તા.૧૧ સુધી ચલાનારી આ ટૂર્નામેન્ટમાં ભાવનગર સહિત સમગ્ર રાજ્યમાંથી ૧૫૦ જેટલા ખેલાડી ભાઈઓ-બહેનોએ ભાગ લીધો છે. આજ પ્રથમ દિવસે ક્વોલિફાઈ રાઉન્ડ રમાયો હતો. જેમાં ભાવનગરના પાંચ ભાઈઓ તથા બહેનોએ ભાગ લીધો હતો. ભાઈઓમાં સમ્સ અલી કામાની ખુબ સરસ રમીને મેઇન ડ્રો માટે પસંદગી પામ્યા છે, જયારે ધર્મદિપસિંહ ચુડાસમા, વંશ મહેતા, કનિકા શર્મા અને માહીન વાઢેર વગેરે ખેલાડીએ પણ સુંદર દેખાવ કર્યો હતો પરંતુ થોડાક અંતરથી તેઓનો પરાજય થયો હતો. અત્યાર સુધી ક્વોલીફાઈ રાઉન્ડ માટે ૩૭ મેચ રમાઈ છે, જેમાં તનિષ ચોક્સી (સુરત), મુદિત જૈન (અમદાવાદ), ઝીઓન જુરિયલ રોડરીક્સ (અમદાવાદ), રૂદ્ર ઓડેરા (પોરબંદર), પાર્થ ઝાલાવાડીયા (વડોદરા), પુષ્યત મિસ્ત્રી (પંચમહાલ), શોર્ય બલિયાન (અમદાવાદ), ભષ્ય પાઠક (કચ્છ), હેત કનોજીયા (વલસાડ), દિવ્યાંશ ગોમ્બર (કચ્છ), અક્ષાંશ વર્મા (રાજકોટ) વગેરે ખેલાડીઓએ મેચો જીતીને મેઇન ડ્રોમાં પ્રવેશ કર્યો છે. મેઇન ડ્રોની મેચો આવતીકાલે સોમવારે સવારે ૯.૦૦ કલાકથી શરૂ થશે. આ ટૂર્નામેન્ટમાં ચીફ રેફરી તરીકે વિનોદ કુરંગીયા અને ડેપ્યુટી રેફરી તરીકે શરદ વર્મા સેવા આપી રહ્યા છે.