હૈદરાબાદના રહેવાસીએ કહ્યું કે ૨૦૧૬ માં, તેણે પણ ઓનલાઈન ગેમ્સમાં નસીબ અજમાવતા ૧૬ લાખ રૂપિયા ગુમાવ્યા હતા
New Delhi, તા.૨૧
સુપ્રીમ કોર્ટે ઓનલાઈન ગેમિંગ વિરુદ્ધની અરજી પર સુનાવણી કરવાનો ઇનકાર કરી દીધો છે. અરજદારે આવી ઘણી વેબસાઇટ્સનો ઉલ્લેખ કર્યો હતો, જેમાં લોકોને તેમના પૈસા રોકાણ કરીને પોતાનું નસીબ અજમાવવાનું કહેવામાં આવે છે. અરજીમાં સની લિયોન, કાજલ અગ્રવાલ, તમન્ના ભાટિયા, મીમી ચક્રવર્તી જેવી ફિલ્મ જગતની ઘણી હસ્તીઓને પણ પક્ષકાર બનાવવામાં આવી હતી. અરજદારે કહ્યું હતું કે, આ બધા લોકો આવી વેબસાઇટ્સનો પ્રચાર કરી રહ્યા છે. આના કારણે, દરરોજ હજારો નિર્દોષ લોકો પૈસા ગુમાવી રહ્યા છે. હૈદરાબાદના રહેવાસી શેખ રહીમે કહ્યું હતું કે, ૨૦૧૬ માં, તેણે પણ ઓનલાઈન ગેમ્સમાં નસીબ અજમાવતા ૧૬ લાખ રૂપિયા ગુમાવ્યા હતા. ત્યારબાદ, જ્યારે તેઓએ તપાસ કરી, ત્યારે જાણવા મળ્યું કે, આવી વેબસાઇટ્સ દરરોજ લોકો પાસેથી લાખો અને કરોડો રૂપિયા વસૂલ કરી રહી છે. આમાંની ઘણી કંપનીઓ વિદેશી છે. આ રીતે, ભારતના પૈસા પણ દેશની બહાર જઈ રહ્યા છે. અરજીમાં કહેવામાં આવ્યું હતું કે, જ્યારે પણ કોઈ બેંક ખાતામાં શંકાસ્પદ વ્યવહાર થાય છે, ત્યારે તેની તપાસ કરવી બેંકોની ફરજ છે. આ પછી, બેંકે આવા ખાતાઓને બ્લોક કરવા પડે છે, પરંતુ ભારતમાં ઘણી બેંકો ઓનલાઈન ગેમિંગ કંપનીઓને ખાતા ચલાવવાની મંજૂરી આપી રહી છે. દર કલાકે તે ખાતાઓમાં મોટી રકમ જમા થાય છે, પરંતુ બેંકો ક્યારેય તેની તપાસ કરતી નથી. સરકાર પણ આવી વેબસાઇટ્સ પર પ્રતિબંધ નથી લગાવી રહી.
અરજીમાં માંગ કરવામાં આવી હતી કે, સુપ્રીમ કોર્ટે કેન્દ્ર સરકારને આવી બધી કંપનીઓને બ્લેકલિસ્ટ કરવા માટે કહેવું જોઈએ. અરજદાર પોતે ચીફ જસ્ટિસ સંજીવ ખન્નાની અધ્યક્ષતાવાળી બેન્ચ સમક્ષ પોતાની અરજીનો પક્ષ લેવા માટે હાજર થયા હતા. ચીફ જસ્ટિસ સંજીવ ખન્નાએ તેમને પ્રશ્ન કર્યો કે, જ્યારે તેઓ પહેલા પોતે આ રમત રમતા હતા તો હવે તે તેમની વિરુદ્ધ કેમ થઈ ગયા છો? અરજદારે જવાબ આપ્યો કે, તે દેશના તમામ લોકોને આવા ખરાબ વ્યસનથી બચાવવા માંગે છે.
અરજી ફાઇલ વાંચતી વખતે, ન્યાયાધીશોને જાણવા મળ્યું કે, શેખ રહીમે અગાઉ દિલ્હી હાઇકોર્ટમાં અરજી દાખલ કરી હતી. અરજદારે જણાવ્યું હતું કે, હાઈકોર્ટે આ વેબસાઇટ્સને બંધ કરવાનો આદેશ આપવામાં રસ દાખવ્યો હતો, પરંતુ બાદમાં આ અરજીને કેન્દ્ર સરકારના આઈટી મંત્રાલયને મેમોરેન્ડમ તરીકે મોકલી દીધી હતી. સરકારે કોઈ કાર્યવાહી ન કરી હોવાથી, હવે તેઓ સુપ્રીમ કોર્ટમાં આવ્યા છે. આના પર ચીફ જસ્ટિસ સંજીવ ખન્નાએ કહ્યું કે, ’જો આવું છે તો તમે ફરીથી હાઈકોર્ટ જઈ શકો છો.’ સુપ્રીમ કોર્ટ આ કેસની સુનાવણી કરશે નહીં.
