સુરતના અડાજણ પોલીસ સ્ટેશનમાં આરોપી સામે કલમ-૪૨૦ની ફરિયાદ નોંધાઇ હતી
Surat , તા.૨૪
કોલસાના વેપારમાં રોકાણના નામે કરોડોની છેતરપિંડીના ગુનામાં મહિલા આરોપીને જામીન પર મુક્ત કરવાનો હાઇકોર્ટે ઇનકાર કર્યો છે. આ કેસની મહિલા આરોપીએ મુખ્ય આરોપી સાથે મળીને લોકોનું ૪.૫૭ કરોડનું ફુલેકું ફેરવ્યું હોવાનો આક્ષેપ છે. સુરતના અડાજણ પોલીસ સ્ટેશનમાં આરોપી સામે કલમ-૪૨૦ની ફરિયાદ નોંધાઇ હતી. ફરિયાદ કરનાર પોતે એક વિધવા મહિલા હતી. જેનો વિશ્વાસ કેળવીને કોલસાના વેપારમાં રોકાણ કરાવવાનું કહીને તેના અને તેના સંબંધીઓ પાસેથી રોકડ તેમજ લોન મેળવીને કુલ ૧.૩૦ કરોડ રૂપિયા જેટલી રકમ આરોપીએ મેળવી લીધી હતી. ત્યારબાદ પરત આપવાનો ઈનકાર કરતાં મામલો બગડ્યો હતો. પોલીસ તપાસમાં એવું સામે આવ્યું હતું કે, આરોપીએ અન્ય રોકાણકારો સાથે પણ ઠગાઈ કરતા કુલ ૪.૫૭ કરોડની ઠગાઈ કરાઈ હતી. રોકાણકારોને જે મહિલા રોકાણની રસીદ આપતી હતી અને જેના નામે કંપની છે. તેનું નામ મુખ્ય આરોપીએ પોલીસ તપાસમાં આપ્યું હતું. જેથી આ ૫૦ વર્ષીય મહિલા આરોપીએ સુરતની કોર્ટમાં આગોતરા જામીન અરજી કરી હતી. જે અરજીને રદ કરી દેવાતા તેણે હોાઇકોર્ટમાં આગોતરા જામીન અરજી કરી હતી. જેને પણ કોર્ટ દ્વારા નકારી દેવામાં આવી હતી.અરજદાર વતી રજૂઆત કરવામાં આવી હતી કે, તેણે ગુનામાં કોઈ સક્રિય ભાગ ભજવ્યો નથી. ચીટિંગમાં તેનો કોઈ રોલ નથી. તેને કોઈ પૈસા લીધા નથી, આરોપી મહિલા ૫૦ વર્ષની છે અને અનેક રોગોથી પીડિત છે. તેનું નામ ફરિયાદમાં નથી ફક્ત મુખ્ય આરોપીના નિવેદનમાં તેનું નામ ખુલ્યું છે. તેણે પોતે પણ આ કંપનીમાં રોકાણ કર્યું છે. આમ, તે પોતે પણ પીડિત જ છે. જોકે, હાઇકોર્ટે નોંધ્યું હતું કે આરોપી મહિલાએ ત્રણ મહિના મુખ્ય આરોપી સાથે કામ કર્યું હતું. મહિલા પોતે માત્ર ધો-૯ સુધી ભણેલી છે. જ્યારે તેને મહિને રૂ. ૪૯ હજાર રૂપિયાનો પગાર આપવામાં આવતો હતો ત્યારે માત્ર નવ ધોરણ પાસ મહિલાને કેવી રીતે કોઈ ૪૯ હજાર રૂપિયા માસિક પગાર આપે? આમ, આ ગુનામાં તેનો સક્રિય રોલ દેખાઈ રહ્યો છે. તેથી હાઈકોર્ટે આરોપીને આગોતરા જામીન આપવા ઇનકાર કરી દીધો હતો.
