તાપસી અથવા પ્રોડક્શન ટીમ તરફથી ‘ઐતરાઝ ૨’માં લીડ રોલ અંગે કોઈ ખુલાસો થયો નથી
Mumbai, તા.૨૧
ભારતમાં સીક્વલનો ટ્રેન્ડ પૂરજોશમાં ખીલી રહ્યો છે. બે-ત્રણ દાયકા જૂની ફિલ્મોની સીક્વલ પણ બની રહી છે ત્યારે આ ટ્રેન્ડમાં બોલિવૂડના શોમેન ગણાતા સુભાષ ઘાઈનું નામ આવી ગયું છે. તેઓ બે દાયકા પહેલાની હિટ ‘ઐતરાઝ’ની સીક્વલ બનાવવા માગે છે. ૨૦૦૪માં રિલીઝ થયેલી આ ફિલ્મમાં પ્રિયંકા ચોપરા જોનાસનો લીડ રોલ હતો. આગામી ફિલ્મમાં તેઓ પ્રિયંકાના સ્થાને તાપસી પન્નુને લેવા માગે છે. સોર્સીસના જણાવ્યા મુજબ, ‘ઐતરાઝ ૨’ના મેકર્સ નારી પ્રધાન ફિલ્મની સ્ટોરી સાથે તાપસી પન્નુને મળ્યા હતા. આમ, તો સુભાષ ઘાઈએ ગત વર્ષે નવેમ્બર મહિનામાં ‘ઐતરાઝ’ની સીક્વલ બનાવવાનું એલાન કર્યુ હતું. આ સમયે તેમણે પ્રિયંકા ચોપરા જોનાસને યાદ કરી હતી. ઘાઈએ કહ્યું હતું કે, તેમણે ત્રણ વર્ષની મહેનત બાદ ળેશ સ્ટોરી તૈયાર કરી છે અને સ્ક્રિપ્ટ ફાઈનલ સ્ટેજમાં છે. સુભાષ ઘાઈની આ સ્ક્રિપ્ટ આખરે ફાઈનલ થઈ ગઈ છે અને તાપસી પન્નુને વાંચવા આપી છે. તાપસી પન્નુને આ સ્ક્રિપ્ટ પસંદ આવી હોવાનું કહેવાય છે. તાપસી અથવા પ્રોડક્શન ટીમ તરફથી ‘ઐતરાઝ ૨’માં લીડ રોલ અંગે કોઈ ખુલાસો થયો નથી. હાલ તો બંને પક્ષો એકબીજા સાથે કામ કરવા ઉત્સુક છે અને વાટાઘાટો ચાલી રહી છે. સુભાષ ઘાઈએ ‘ઐતરાઝ’ની વાત કરતા કહ્યું હતું કે, આ ફિલ્મમાં લીડ રોલ માટે અન્ય કોઈ એક્ટ્રેસ તૈયાર થઈ ન હતી. પ્રિયંકા ચોપરાએ હિંમત બતાવી અને મુક્તા આટ્ર્સની આ ફિલ્મમાં ૨૦ વર્ષ બાદ પણ પ્રિયંકાને લોકો ભૂલી શક્યા નથી. હવે ‘ઐતરાઝ ૨’ બનાવવાની તૈયારીઓ ચાલી રહી છે. સુભાષ ઘાઈએ સીક્લવની જાહેરાત કરતી વખતે કાસ્ટ અંગે વાત કરી ન હતી. હવે તેમને લીડ એક્ટ્રેસ મળી ગઈ હોય તેમ લાગે છે. તાપસી પન્નુની ફિલ્મોને કમર્શિયલ સફળતા ખાસ મળતી નથી, પરંતુ એક્ટર તરીકે તેના ખૂબ વખાણ થયા છે. તાપસી પન્નુ પોતાના દમ પર ફિલ્મને અસરકારક બનાવી શકે છે. કોમેડી, એક્શન જેવી દરેક જોનરમાં તાપસીના રોલના વખાણ થાય છે. એક્ટિંગમાં તાપસી પર ભરોસો રાખી શકાય તેમ છે. વળી, એ ગ્રેડ એક્ટ્રેસની સરખામણીએ તાપસીની ફી ઓછી છે. તાપસીની લોકપ્રિયતા અને કામ પ્રત્યે સમર્પણના કારણે સુભાષ ઘાઈએ તેને પસંદ કરી હોવાનું મનાય છે. ૨૦૦૪માં રિલીઝ થયેલી ‘ઐતરાઝ’માં અક્ષય કુમાર, કરીના કપૂર ખાન અને પ્રિયંકા ચોપરા હતા. સુભાષ ઘાઈએ ‘ઐતરાઝ ૨’ જાહેર કરી ત્યારે પ્રિયંકાના વખાણ કર્યા હતા. જેના કારણે સીક્વલમાં પણ પ્રિયંકાને લેવાય તેવી શક્યતા દેખાતી હતી. જો કે નવી પેઢી માટે નવી સ્ટોરી સાથે આવેલા સુભાષ ઘાઈ નવા ચહેરાને લેવા માગે છે. જેના માટે તેમણે તાપસીને પસંદ કરી છે. આ ફિલ્મનું ડાયરેક્શન ‘ઓહ માય ગોડ ૨’ના સુકાની અમિત રાયને સોંપવામાં આવ્યું છે.
