Srinagar,તા.24
દેશભરમાં હવામાનના બે અલગ-અલગ રૂપ જોવા મળી રહ્યા છે. એક તરફ ઉત્તર ભારતમાં ઠંડીનો પ્રકોપ વધી રહ્યો છે, તો બીજી તરફ દક્ષિણ ભારતમાં ભારે વરસાદે જનજીવનને અસર કરી છે. હવામાન વિભાગે આગામી એક-બે દિવસમાં ઉત્તર ભારતમાં શીતલહેરની આગાહી કરી છે અને દક્ષિણના છ રાજ્યોમાં ભારે વરસાદનું એલર્ટ જાહેર કર્યું છે.
હવામાન વિભાગ અનુસાર, દિલ્હીમાં લઘુત્તમ તાપમાન 10 ડિગ્રી સેલ્સિયસ સુધી પહોંચવાની સંભાવના છે, જ્યારે મહત્તમ તાપમાન 25 ડિગ્રી સેલ્સિયસ રહી શકે છે. સવાર-સાંજ 20 થી 25 કિમી પ્રતિ કલાકની ઝડપે પવન ફૂંકાવા છતાં પ્રદૂષણમાંથી રાહત મળવાની શક્યતા ઓછી છે.
યુપીમાં પણ તાપમાનમાં ઘટાડો નોંધાશે. આગ્રા, કાનપુર, ગોરખપુર, પ્રયાગરાજ અને વારાણસી જેવા શહેરોમાં તાપમાન ઝડપથી ઘટશે. પશ્ચિમી ઉત્તર પ્રદેશમાં શીતલહેરનો પ્રકોપ જોવા મળી શકે છે.
રાજ્યના મોટાભાગના જિલ્લાઓમાં કડકડતી ઠંડીની શરૂઆત થઈ ગઈ છે. મહત્તમ તાપમાનમાં ઘટાડો અને 15 થી 20 કિમી પ્રતિ કલાકની ઝડપે પવન ફૂંકાવાની શક્યતા છે. હવામાન વિભાગે લોકોને સાવચેતી રાખવા અપીલ કરી છે.
પર્વતીય રાજ્યોમાં ઠંડી સતત વધી રહી છે. કાશ્મીર ઘાટી અને અન્ય ઊંચાઈવાળા વિસ્તારોમાં રાત્રિનું તાપમાન શૂન્યથી નીચે જઈ રહ્યું છે. શ્રીનગરમાં રાત્રે લઘુત્તમ તાપમાન માઈનસ 2.8 ડિગ્રી સેલ્સિયસ નોંધાયું હતું, જે આ સિઝનની સૌથી ઠંડી રાત હતી.અન્યત્ર તાપમાન શૂન્ય ડીગ્રી થયું હતું.
હિમાચલમાં 13 સ્થળોએ લઘુત્તમ તાપમાન 5 ડિગ્રી સેલ્સિયસથી ઓછું નોંધાયું હતું. ઉત્તરાખંડમાં સવાર-સાંજ ઠંડીનું જોર વધ્યું છે. પહાડોમાં હિમવર્ષા અને મેદાની વિસ્તારોમાં હળવા ધુમ્મસને કારણે મુશ્કેલીઓ વધી રહી છે.
હવામાન વિભાગના અનુમાન મુજબ, તમિલનાડુ, કેરળ, આંધ્ર પ્રદેશ, પશ્ચિમ બંગાળ, ઓડિશા અને આંદામાન-નિકોબાર દ્વીપસમૂહના ઘણા વિસ્તારોમાં ભારેથી અતિ ભારે વરસાદની સંભાવના છે. આ દરમિયાન દરિયા કિનારે રહેતા માછીમારોને સતર્ક રહેવા માટે કહેવામાં આવ્યું છે.
