Mumbai,તા.20
તાજેતરમાં થિયેટરોમાં રિલીઝ થયેલી ફિલ્મોનું કલેક્શન સતત ઘટી રહ્યું છે. જેમાં બોલિવૂડની ‘હાઉસફુલ 5’, સાઉથની ફિલ્મ ‘ઠગ લાઇફ’ અને હોલિવૂડની ‘હાઉ ટુ ટ્રેન યોર ડ્રેગન’ સામેલ છે. ગુરુવારે બોક્સ ઓફિસ પર આ ફિલ્મોએ કેવું પ્રદર્શન કર્યું, તે આપણે આ અહેવાલમાં વિગતવાર જાણીશું.
’હાઉસફુલ 5’ની કમાણીએ નિરાશ કર્યા
અક્ષય કુમાર, અભિષેક બચ્ચન અને રિતેશ દેશમુખની ફિલ્મ ‘હાઉસફુલ 5’ જબરદસ્ત પબ્લિસિટી સાથે રિલીઝ થઈ હતી. આ ફિલ્મે પહેલા દિવસે 24 કરોડની જબરદસ્ત કમાણી સાથે અપેક્ષાઓ વધારી દીધી હતી. પરંતુ ટૂંક સમયમાં જ ફિલ્મની કમાણીમાં ઘટાડો થવા લાગ્યો.
ગુરુવારે આ ફિલ્મનું ટર્નઓવર 2.75 કરોડ રૂપિયા હતું, જે બુધવારે 4.25 કરોડ રૂપિયાના અડધાથી પણ ઓછું હતું. સોમવારે આ આંકડો 3.75 કરોડ રહ્યો હતો.
એકંદરે ’હાઉસફુલ 5’એ અત્યાર સુધીમાં 168 કરોડની કમાણી કરી છે, પરંતુ નિષ્ણાતોનું માનવું છે કે, 225 કરોડના બજેટને ધ્યાનમાં લેતાં આ કમાણીથી ફિલ્મ માટે કોઇ ફરક પડતો નથી. હાલ બજેટ જેટલી કમાણી કરવી એક પડકાર છે.
કમલ હાસનની ઠગ ઓફ લાઈફે દર્શકોને નિરાશ કર્યા
તો બીજી તરફ કમલ હાસનની ફિલ્મ ‘ઠગ લાઇફ’ પણ બોક્સ ઓફિસ પર ખરાબ પ્રદર્શન કરી રહી છે. આ ફિલ્મનું બજેટ 200 કરોડ રૂપિયા હોવાનું જાણવા મળ્યું છે, પરંતુ ફિલ્મે અત્યાર સુધીમાં માત્ર 47.73 કરોડની કમાણી કરી છે. 15મા દિવસે ગુરૂવારે આ ફિલ્મે માત્ર 21 લાખ રૂપિયાની કમાણી કરી હતી.
જે ખૂબ જ ઓછી છે. દર્શકોએ આ ફિલ્મની સ્ટોરીને નબળી ગણાવી છે, જ્યારે કમલ હાસનના અભિનયના વખાણ થયા હતા. મણિરત્નમ દિગ્દર્શિત આ ફિલ્મને ઘણી અપેક્ષાઓ હતી પરંતુ દર્શકોને ખાસ આકર્ષવામાં નિષ્ફળ નીવડી હતી.
‘હાવ ટુ ટ્રેન યોર ડ્રેગન’ નું સ્થિર પ્રદર્શન
હોલિવૂડની “હાઉ ટુ ટ્રેન યોર ડ્રેગન” 13 જૂને રિલીઝ થઈ હતી. આ ફિલ્મ 2010માં આવેલી આ જ નામની એનિમેટેડ ફિલ્મનું લાઇવ-એક્શન વર્ઝન છે. શરૂઆતથી જ તેની કમાણી સરેરાશ રહી છે. પહેલા દિવસે 2.15 કરોડ રૂપિયાની કમાણી કરનારી આ ફિલ્મે પહેલા રવિવારે પોતાનો શ્રેષ્ઠ દિવસ પસાર કર્યો હતો, જ્યારે તેણે 4.5 કરોડ રૂપિયાની કમાણી કરી હતી.
બુધવારે આ ફિલ્મનું ટર્નઓવર 91 લાખ રૂપિયા હતું, જ્યારે ગુરુવારે આ આંકડો 95 લાખ રૂપિયા સુધી પહોંચી ગયો હતો. એકંદરે આ ફિલ્મે અત્યાર સુધીમાં 15.41 કરોડની કમાણી કરી છે. આ ફિલ્મે તેની વાર્તા અને વિઝ્યુઅલ ઇફેક્ટ્સથી પ્રેક્ષકોને અમુક હદ સુધી જકડી રાખ્યાં છે.
આ સમયે ‘હાઉસફુલ 5’ અને ‘ઠગ લાઇફ’ બંને ફિલ્મોને બોક્સ ઓફિસ પર પોતાનો ખર્ચ વસૂલ કરવામાં ઘણી મુશ્કેલી પડી રહી છે. ‘હાઉસફુલ 5’ની શરૂઆતની ચમક ફીકી પડી ગઈ છે, ત્યારે ‘ઠગ લાઈફ’ દર્શકોને ખાસ પ્રભાવિત કરી શકી નથી.
તેનાથી વિપરીત, હોલિવૂડની “હાઉ ટુ ટ્રેઇન યોર ડ્રેગન” ધીમે ધીમે કરી રહી છે, પરંતુ તે પોતાનું સ્થાન જાળવી રહ્યું છે. આગામી દિવસોમાં આ ફિલ્મો પોતાની કમાણી વધારી શકે છે કે નહીં તે જોવું રસપ્રદ બની રહેશે.
