Ahmedabad,તા.24
ગુજરાતના અનેક વિસ્તારોમાંથી ચોમાસાની વિદાય થઈ રહી છે. તો બીજી બાજુ નવરાત્રીમાં પણ રાજ્યમાં વરસાદી માહોલ યથાવત છે. ખાસ કરીને દક્ષિણ ગુજરાતમાં સારો વરસાદ જોવા મળી રહ્યો છે. જેના કારણે ગરબા આયોજકો અને ખેલૈયાઓમાં ચિંતા છે.
આજે પણ અનેક જિલ્લાઓમાં ગાજવીજ સાથે વરસાદની આગાહી આપવામાં આવી છે. જોકે, હાલ 26મી સપ્ટેમ્બર સુધીમાં ક્યાંય ભારે વરસાદની આગાહી આપવામાં આવી નથી. જેના કારણે ખેલૈયાઓની ચિંતા થોડી ઓછી થઈ છે.
દક્ષિણપશ્ચિમ ચોમાસાની વિદાય રેખા તરનતારન, સાંગર, જીંદ, રેવાડી, ટોંક, મહેસાણા, પોરબંદરમાંથી પસાર થઈ રહી છે. હવામાન વિભાગે આપેલી માહિતી પ્રમાણે, ગુજરાતમાં આજથી એટલે કે, 24મીથી 29મી સપ્ટેમ્બર સુધી વરસાદની આગાહી આપવામાં આવી છે.
આ સાથે ગાજવીજની પણ આગાહી આપવામાં આવી છે. 27થી 29મી સપ્ટેમ્બર સુધીમાં ભારે વરસાદની આગાહી આપવામાં આવી છે. આજે 24મી સપ્ટેમ્બરના રોજ ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટાઉદેપુર, નર્મદા, ભરૂચ, સુરત, તાપી, નવસારી, વલસાડ, રાજકોટ, જૂનાગઢ, અમરેલી, ભાવનગર, ગીર સોમનાથ અને બોટાદ જિલ્લાનાં છૂટાંછવાયાં સ્થળોએ હળવાથી મધ્યમ વરસાદ પડવાની આગાહી આપવામાં આવી છે. 25મી તારીખે વરસાદની તીવ્રતા ઓછી થતી દેખાય છે.
26મી તારીખે વરસાદની તીવ્રતા ઓછી હશે. 26થી 29મી સુધીમાં આણંદ, પંચમહાલ, દાહોદ, વડોદરા, છોટાઉદેપુર, નર્મદા, ભરૂચ, સુરત, તાપી, નવસારી, વલસાડ, રાજકોટ, જૂનાગઢ, અમરેલી, ભાવનગર, ગીર સોમનાથ અને બોટાદ જિલ્લાનાં છૂટાંછવાયાં સ્થળોએ હળવાથી મધ્યમ વરસાદ પડવાની આગાહી આપવામાં આવી છે.
આ સાથે આ વિસ્તારોમાં ગાજવીજ થવાની પણ આગાહી છે. 27મી તારીખે તાપી, નવસારી, ડાંગ, વલસાડમાં ભારે વરસાદની આગાહી સાથે યલો એલર્ટ આપવામાં આવ્યું છે.
28મી તારીખે સુરત, તાપી, નવસારી, ડાંગ, વલસાડમાં ભારે વરસાદની આગાહી સાથે યલો એલર્ટ આપવામાં આવી છે. જેમાં છૂટાછવાયા સ્થળો પર ભારે વરસાદની આગાહી કરવામાં આવી છે. 29મી તારીખે સુરત, તાપી, નવસારી, ડાંગ, વલસાડમાં ભારે વરસાદની આગાહી સાથે યલો એલર્ટ આપવામાં આવ્યું છે.
