નારોલના વેપારીનો નંબર ટેલિફોનની ડિરેક્ટરીમાં મેળવ્યા બાદ ફોન કરીને રૂ. ૬.૧૬ લાખના ૨ ડીપળીઝર અને ૧ વર્ટિકલ કૂલરનો ઓર્ડર આપ્યો હતો
Ahmedabad, તા.૨૮
વેપારીઓની ટેલિફોનની ડિરેક્ટરીમાંથી નંબર શોધીને વેપારી સાથે ઠગાઈ આચરી હોવાનો ચોંકાવનારો કિસ્સો પ્રકાશમાં આવ્યો છે. નારોલના વેપારીનો નંબર ટેલિફોનની ડિરેક્ટરીમાં મેળવ્યા બાદ ફોન કરીને રૂ. ૬.૧૬ લાખના ૨ ડીપળીઝર અને ૧ વર્ટિકલ કૂલરનો ઓર્ડર આપ્યો હતો અને તેની ચૂકવણી પેટે ચેક આપ્યા હતા. જોકે, નારોલના વેપારીએ ચેક જમા કરાવતા તે બાઉન્સ થયા હતા. આ મામલે નારોલના વેપારીએ પ્રગતિનગર, નારણપુરાના વેપારી વિરુદ્ધ ઠગાઈની પોલીસ ફરિયાદ નોંધાવતા તપાસ શરૂ કરાઈ છે.મણિનગરની રામબાગ સોસાયટીમાં રહેતા સુનિલકુમાર બ્રહ્મભટ્ટ નારોલમાં વેપાર-ધંધો કરે છે. ગત વર્ષે જસ્ટડાયલ કંપનીમાંથી તમારો નંબર મળ્યો છે તેમ કહીને એક શખસે ફોન કર્યો હતો અને ડીપળીઝર તેમજ વર્ટિકલ કૂલર માટેના ભાવ અંગેની વાતચીત કરી હતી. ત્યારબાદ વેપારી સુનિલભાઈએ તે શખસને તેમની પ્રોડક્ટનું ભાવ સાથેનું બ્રોશર મોકલી આપ્યું હતું. બાદમાં તે શખસે વેપારીને ફરીથી ફોન કરીને ૨ ડીપળીઝર અને ૧ વર્ટિકલ કૂલરનો ઓર્ડર આપ્યો હતો તથા તેની ચૂકવણી માટે વેપારી પાસેથી તેમની બેંક ડિટેલ પણ મંગાવી હતી. ચેકથી પેમેન્ટ થશે તેવી વેપારી અને તે શખસ વચ્ચે વાતચીત થઈ હતી. ત્યારબાદ વેપારીએ ઓર્ડર પ્રમાણેના ૨ ડીપળીઝર અને ૧ વર્ટિકલ કૂલર પેક કરીને નારણપુરા મોકલી આપવા માટે ટેમ્પો ભાડે કર્યો હતો.આ દરમિયાન તે શખસે વેપારીને ફોન કરીને જણાવ્યું કે, ઓર્ડરની ડિલિવરી પ્રગતિનગર હાઉસિંગ, વરદાન ટાવરની સામે જ મોકલી આપજો, પરંતુ આ મટિરિયલ તમારી ટ્રકમાંથી ખાલી કરીને મારે બીજે મોકલવાનું હોવાથી તમારા ડ્રાઇવરને કહેજો કે મદદ કરે. શખસે આ પ્રકારની વ્યાવસાયિક શૈલીમાં વાત કરતા વેપારીને તેના પર વિશ્વાસ બેસી ગયો હતો. ત્યારબાદ નક્કી થયા મુજબ ડિલિવરી પહોંચી જતાં શખસે આવેલી ટ્રકમાંથી ૨ ડીપફ્રીઝર અને ૧ વર્ટિકલ કૂલર નીચે ઉતરાવીને પોતાની ટ્રકમાં મૂકી દીધા હતા.બીજી બાજુ, શખસે ખરીદેલા મટિરિયલના રૂપિયાનો ચેક બેંકમાં જમા કરાવ્યો હોવાની સ્લિપ પણ નારોલના વેપારીને વોટ્સએપ મારફતે મોકલી આપી હતી. દરમિયાન ગત વર્ષે ઓક્ટોબર મહિનામાં કુલ રૂ. ૬.૧૬ લાખનો માલ ખરીદીને વેપારીને તેના રૂપિયા ચૂકવતો નહોતો. જ્યારે નારોલના વેપારીએ કડકાઈપૂર્વક રૂપિયાની માગણી કરી ત્યારે તે રોજેરોજ બહાના કાઢ્યા કરતો હતો. શખસે આપેલા ચેક બાઉન્સ થતાં સમગ્ર હકીકત સામે આવી હતી. ત્યારબાદ વેપારી સુનિલ બ્રહ્મભટ્ટે આ અંગે હેતલભટ્ટ વિરુદ્ધ ઠગાઈનો ગુનો નોંધી તપાસ આદરી છે.જસ્ટડાયલમાંથી વેપારીનો નંબર મેળવ્યા બાદ ફોન કરીને શખસે પોતાની ઓળખ છુપાવવા માટે વેપારી મનીષ પટેલનું નામ ધારણ કરીને વેપારી સાથે વાત કરી હતી. બાદમાં ઓર્ડર મગાવ્યો અને તેના પેમેન્ટ માટે વેપારીએ આપેલા ચેક જમા કરાવવામાં આવ્યા ત્યારે ચેક બાઉન્સ થતાં આખરે સમગ્ર ભાંડો ફૂટ્યો હતો.
