Rajkot. તા.15
મેટોડાની સીમમાંથી 68.32 લાખના દારૂ સાથે જામનગરના બે શખ્સોને રૂરલ એલસીબીની ટીમે પકડી પાડી મોટી કાર્યવાહી કરી હતી. દારૂનું કટીંગ થાય તે પહેલાં જ ટીમ ત્રાટકી હતી અને દારૂની રખેવાળી કરતાં નામીચા શખ્સોને દબોચી 20664 બોટલ દારૂ કબ્જે કર્યો હતો. રાજકોટના જયપાલસિંહ વાઘેલાએ દારૂ મંગાવ્યો હોવાનું ખુલતાં તેની શોધખોળ આદરી હતી.
રાજકોટ રેન્જ આઈજી અશોકકુમાર યાદવ, એસપી વિજયસિંહ ગુર્જર દ્રારા દારૂ-જુગારની પ્રવૃતિ શોધી કાઢી ગેર-કાયદેસર પ્રવૃતિ સદંતર નાબુદ કરવાની આપેલ સૂચનાથી રૂરલ એલસીબી પીઆઈ વી.વી.ઓડેદરાના માર્ગદર્શન હેઠળ પીએસઆઈ એચ.સી.ગોહીલ ટીમ સાથે નાઈટ કોમ્બીંગ રાઉન્ડમા હતા જે દરમ્યાન સાથેના એએસઆઇ રવિદેવભાઇ બારડ, બ્રિજરાજસિંહ જાડેજા, રોહિતભાઇ બકોતરા અને કોન્સ્ટેબલ પ્રકાશભાઇ પરમારને મેટોડા ગામની સીમમા આવેલ એક વાડીની ઓરડીમા મોટો દારૂનો જથ્થો હોવાની મળેલ ચોક્કસ બાતમીના આધારે ટીમે દરોડો પાડી બે શખ્સોને દબોચી લીધાં હતા.
પકડાયેલ શખ્સોના નામ પૂછતા હનિફ એલિયાસ જેડા (ઉ.વ.26, રહે. જામનગર ચકલી કાંટા પાસે, જોડીયા) અને જાકીર કાસમ સંઘાર (ઉ.વ.26, રહે. જામનગર રામેશ્વર માટેલ ચોક) ને પકડી પાડ્યાં હતાં. પોલીસે વાડીની ઓરડીમાંથી વિદેશી દારૂની અલગ-અલગ બ્રાન્ડની કુલ 20,664 બોટલ રૂ.68,32,800 જથ્થો મળી આવતાં બંને શખ્સોની ધરપકડ કરી દારૂ, બાઈક સહિત 68.92 લાખનો મુદામાલ કબ્જે કરી પૂછતાછ હાથ ધરી હતી.
વધુમાં પોલીસ સૂત્રોના જણાવ્યા મુજબ, પકડાયેલ બંને શખ્સો દારૂની રખેવાળી કરી અલગ અલગ બુટલેગરોને કટીંગ કરાવતાં હતાં. જ્યારે આ દારૂનો જથ્થો રાજકોટના જયપાલસિંહ ઉર્ફે યુવરાજસિંહ લાલુભા વાઘેલા નામના શખ્સે મંગાવ્યાની કબૂલાત આપતાં પોલીસે તેની શોધખોળ હાથ ધરી હતી.
ઉલ્લેખનીય છે કે, પકડાયેલ હનીફ લ જેડા સામે હત્યા, હત્યાનો પ્રયાસ અને જાકીર સંઘાર સામે પણ હત્યાનો પ્રયાસ, ચોરી સહિતના ગુના નોંધાયેલ છે. જ્યારે ફરાર જયપાલસિંહ વાઘેલા સામે પણ રાજકોટના પોલીસ મથકમાં ગુના નોંધાયેલ છે.
