Mumbai, તા.૨૧
બોલિવૂડ અને મનોરંજન જગતમાંથી એક અત્યંત દુઃખદ સમાચાર સામે આવ્યા છે. આલિયા ભટ્ટ અભિનીત ફિલ્મ ડાર્લિંગ્સમાં મહિલા કોન્સ્ટેબલની ભૂમિકા ભજવનાર અભિનેત્રી Divya Vinkarનું અચાનક અવસાન થયું છે. તેમની ઉંમર આશરે ૪૦ વર્ષની હોવાનું જણાવાયું છે. આ અણધાર્યા અને આઘાતજનક સમાચાર સામે આવ્યા બાદ તેમના મિત્રો, સાથી કલાકારો અને ચાહકોમાં ઘેરા શોકની લાગણી વ્યાપી ગઈ છે.
દિવ્યા વિનકરના નિધનની માહિતી તેમની નજીકની મિત્ર અને રેડિયો જોકી (ઇત્ન) રોહિણી રામનાથને સોશિયલ મીડિયા પર એક ભાવુક પોસ્ટ શેર કરીને આપી હતી. ૨૦ ઓક્ટોબરે ઇન્સ્ટાગ્રામ પર પોસ્ટ કરતાં રોહિણીએ જણાવ્યું કે દિવ્યાનું જવું અત્યંત આકસ્મિક અને અણધાર્યું હતું.
તેમણે દિવ્યાને સ્નેહપૂર્વક ડ્ઢફ કહીને સંબોધતાં લખ્યું કે તે અંગત અને વ્યાવસાયિક બંને સ્તરે તેમના માટે એક મજબૂત આધારસ્તંભ સમાન હતી. દિવ્યાનું કામ પ્રત્યેનું સમર્પણ, દયાળુ સ્વભાવ અને સમજણ તેને અન્યો કરતાં સાવ અલગ બનાવતા હતા. આ સાથે જ તેમણે આ કપરા સમયમાં દિવ્યાના પરિવારની પ્રાઈવસીનું સન્માન કરવાની પણ અપીલ કરી હતી.
દિવ્યા વિનકરને વર્ષ ૨૦૨૨માં નેટફ્લિક્સ પર રિલીઝ થયેલી ફિલ્મ ડાર્લિંગ્સમાં લેડી કોન્સ્ટેબલના પાત્ર માટે વિશેષ ઓળખ મળી હતી. જસ્મીત કે. રીનના દિગ્દર્શનમાં બનેલી આ ફિલ્મમાં આલિયા ભટ્ટ, શેફાલી શાહ, વિજય વર્મા અને રોશન મેથ્યુ મુખ્ય ભૂમિકાઓમાં હતા. આ સિવાય દિવ્યા વિદ્યા બાલન અને શેફાલી શાહ અભિનીત ૨૦૨૨ની ફિલ્મ જલસાના સ્ક્રીન ક્રેડિટ્સમાં પણ સામેલ હતી. ભલે તેણે મોટા પડદા પર સીમિત પાત્રો ભજવ્યા, પરંતુ પોતાના અભિનયથી તેણે આગવી છાપ છોડી હતી.
દિવ્યા માત્ર એક અભિનેત્રી જ નહોતી, પરંતુ ડિજિટલ કન્ટેન્ટ ક્રિએટર, ફ્રીલાન્સ રાઈટર અને કવયિત્રી પણ હતી. અભિનય ક્ષેત્રે પ્રવેશતા પહેલાં તેણે લગભગ એક દાયકા સુધી ડિજિટલ માર્કેટિંગના ક્ષેત્રમાં કામ કર્યું હતું. ત્યારબાદ વર્ષ ૨૦૧૮માં તેણે પર્ફોર્મિંગ આર્ટ્સમાં ડગ માંડ્યા અને અભિનયની સાથે-સાથે લેખનમાં પણ સક્રિય રહી. હાલમાં તેના નિધનના ચોક્કસ કારણો અંગે સત્તાવાર પુષ્ટિ થઈ શકી નથી, પરંતુ આટલી નાની ઉંમરે તેના અચાનક વિદાયથી સમગ્ર સિનેમા જગત સ્તબ્ધ થઈ ગયું છે.
