Paris,તા.06
ભારતની રેસલર વિનેશ ફોગાટે 50 kg ફ્રી સ્ટાઇલ રેસલિંગમાં ક્વાર્ટર ફાઇનલમાં પ્રવેશ મેળવી લીધો છે. વિનેશે પોતાની મેચમાં જાપાનની વર્લ્ડ નંબર વન અને ટોક્યો ઓલિમ્પિકની ગોલ્ડ મેડલ વિજેતા રેસલરને પછાડી હતી.
યુઈ સુસાકી ટોક્યો ઓલિમ્પિકમાં ગોલ્ડ મેડલ જીતી હતી. તેને પરાજય આપવો વિનેશ માટે મુશ્કેલ લાગી રહ્યો હતો. પરંતુ તેણે પ્રતિસ્પર્ધીને પોતાના દાવથી ચોંકાવી અને ધોબીપછાડ આપી હતી.
આ સાથે વિનેશ હવે ક્વાર્ટર ફાઇનલમાં પહોંચી ગઈ છે. આ ઇવેન્ટમાં વિનેશને ગોલ્ડ મેડલ જીતવા માટે પ્રબળ દાવેદાર માનવામાં આવી રહી છે.
છેલ્લી મિનિટમાં બદલાયો દાવ
વિનેશ શરુઆતમાં આ મુકાબલામાં પાછળ હતી અને છેલ્લી મિનિટ પહેલાં સુધી 2-0થી પાછળ હતી. છેલ્લી મિનિટમાં તેણે જબરદસ્ત દાવ લગાવીને 3-2થી મેચ પોતાના પક્ષમાં લાવી દીધી હતી અને યુઈ સુસાકીને હરાવી દીધી હતી. યુઈ સુસાકી નંબર વન રેસલર છે અને તે આજ સુધી ક્યારેય નહોતી હારી. પરંતુ ઓલિમ્પિક જેવા પ્લેટફૉર્મ પર વિનેશે પોતાનો વિજયી દાવ ખેલીને તેને પછાડી હતી.
