Mumbai, તા.28
ટીમ ઈન્ડિયાના દિગ્ગજ ટેસ્ટ બેટ્સમેન ચેતેશ્વર પૂજારાએ તાજેતરમાં જ આંતરરાષ્ટ્રીય ક્રિકેટને અલવિદા કહ્યું. પોતાના મોટા નિર્ણય બાદ, વિરાટ કોહલીએ હવે તેના સાથી ખેલાડીને ભવિષ્ય માટે શુભકામનાઓ પાઠવી છે.
વિરાટ કોહલીએ પૂજારાની નિવૃત્તિ પર ખૂબ જ ખાસ વાત કહી. તેણે ઈન્સ્ટાગ્રામ પર પોતાનો અને પૂજારાનો ફોટો પોસ્ટ કર્યો અને લખ્યું કે તમે મારું કામ સરળ બનાવી દીધું.
ટીમ ઈન્ડિયાના અનુભવી ખેલાડી વિરાટ કોહલીએ ચેતેશ્વર પૂજારાની નિવૃત્તિ બાદ તેની કારકિર્દીને સલામ કરી. વિરાટ કોહલીએ ઈન્સ્ટાગ્રામ સ્ટોરી પર લખ્યું- નંબર 4 પર મારું કામ સરળ બનાવવા બદલ પૂજારાનો આભાર. તમારી કારકિર્દી અદ્ભુત હતી. ભવિષ્ય માટે શુભકામનાઓ. ભગવાન તમને આશીર્વાદ આપે.
ચેતેશ્વર પૂજારાએ ભારત માટે નંબર 3 પર શાનદાર પ્રદર્શન કર્યું. આ ખેલાડીએ 155 ટેસ્ટ ઇનિંગ્સમાં 44.41ની સરેરાશથી 6529 રન બનાવ્યા. પૂજારાએ ટેસ્ટ ક્રિકેટમાં નંબર 3 પર 18 સદી અને 32 અડધી સદી ફટકારી. રાહુલ દ્રવિડ પછી નંબર 3 પર ભારતનું આ શ્રેષ્ઠ પ્રદર્શન છે. સ્પષ્ટ છે કે આ જ કારણ છે કે વિરાટે આ દિગ્ગજ ખેલાડીને સલામ કરી છે.
