Gaza,તા.૧૬
ઇઝરાયલી કસ્ટડીમાં કાર્યકર્તા ગ્રેટા થનબર્ગનું શું થયું? હવે, સ્વીડિશ પર્યાવરણીય કાર્યકર્તાએ પોતાનું મૌન તોડ્યું છે. ૨૨ વર્ષીય આબોહવા કાર્યકર્તા ગ્રેટા થનબર્ગે ગાઝા ફ્લોટિલાની ધરપકડ બાદ ઇઝરાયલી કસ્ટડીમાં ત્રાસ આપવાના ગંભીર આરોપો લગાવ્યા હતા. ફીડેમ ફ્લોટિલામાં ભાગ લીધા બાદ ઇઝરાયલી અધિકારીઓ દ્વારા અટકાયતમાં લેવામાં આવ્યા બાદ ગ્રેટા થનબર્ગે પહેલી વાર જાહેરમાં તેણી પર થયેલા કથિત દુર્વ્યવહાર વિશે વાત કરી હતી.
ફ્લોટિલાનો હેતુ ગાઝામાં નાકાબંધી હેઠળ પેલેસ્ટિનિયનોને માનવતાવાદી સહાય પહોંચાડવાનો હતો. જો કે, આ મહિનાની શરૂઆતમાં, ઇઝરાયલી દળોએ મિશનમાં વિક્ષેપ પાડ્યો, અનેક જહાજોમાં ચઢી ગયા, પાણીની તોપનો ઉપયોગ કર્યો અને ૪૦૦ થી વધુ લોકોની અટકાયત કરી.
ગ્રેટા થનબર્ગ અને તેના સાથી કાર્યકરોને ઉચ્ચ સુરક્ષાવાળી જેલમાં રાખવામાં આવ્યા. તેમને ઘણા દિવસો પછી મુક્ત કરવામાં આવ્યા, પરંતુ હવે તેઓ દાવો કરે છે કે તેમની અટકાયત દરમિયાન તેમને શારીરિક શોષણ, ધમકીઓ અને ઉત્પીડનનો સામનો કરવો પડ્યો. ગ્રેટા થનબર્ગે હવે ખુલાસો કર્યો છે કે ગાર્ડ્સે તેણીનું શારીરિક શોષણ કર્યું, ધમકી આપી અને ઉત્પીડન કર્યું, જેમાં તેણીને બાંધી અને પછી તેણીને સેલ્ફી લેવા માટે દબાણ કરવાનો સમાવેશ થાય છે.
થનબર્ગે સ્વીડિશ આઉટલેટ એફ્ટનબ્લાડેટને જણાવ્યું હતું કે ગાર્ડ્સમાં કોઈ સહાનુભૂતિ કે માનવતા નહોતી અને તેઓ તેની સાથે સેલ્ફી લેતા રહ્યા. “ઘણું બધું મને યાદ નથી. તેઓ મને ત્યાં ખેંચી ગયા જ્યાં બીજા લોકો બેઠા હતા, અને આખો સમય મારી આસપાસ એક ધ્વજ લટકતો હતો. તેઓએ મને માર માર્યો અને લાત મારી,” તેણીએ ઉમેર્યું. “એક સાથે ઘણું બધું થઈ રહ્યું છે. તમે આઘાતમાં છો. તમને દુખાવો થાય છે, પરંતુ તમે શાંત રહેવાનો પ્રયાસ કરો છો.” થનબર્ગે કહ્યું કે તેણીએ લગભગ ૫૦ લોકોને ઘૂંટણિયે, હાથકડી પહેરેલા અને કપાળે જમીન પર જોયા.
તેણીએ દાવો કર્યો હતો કે ઇઝરાયલી ગાર્ડ્સે તેના હાથ કડક રીતે બાંધ્યા હતા અને, તેણી શાંત થયા પછી, તેની સાથે સેલ્ફી લેવા માટે લાઇનમાં ઉભા હતા. થનબર્ગે એવો પણ આરોપ લગાવ્યો હતો કે એક સમયે, અટકાયતીઓને ગેસથી ધમકી આપવામાં આવી હતી. તેણીએ કહ્યું કે ગાર્ડ્સ પછી આવ્યા અને કહ્યું, “અમે તમને ગેસથી ભરીશું.” આ તેમના માટે સામાન્ય વાત હતી. તેઓએ ગેસ સિલિન્ડર લહેરાવ્યો અને ધમકી આપી.
થનબર્ગે ભાર મૂક્યો કે ધ્યાન નાકાબંધી અને દુષ્કાળનો સામનો કરી રહેલા પેલેસ્ટિનિયનો પર હોવું જોઈએ, તેના વ્યક્તિગત અનુભવ પર નહીં. તેણીએ કહ્યું, “વ્યક્તિગત રીતે, હું મારી સાથે શું થયું તે વિશે વાત કરવા માંગતી નથી કારણ કે હું તેને હેડલાઇન બનાવવા માંગતી નથી.”
