Washington,તા.૬
ભારત અને અમેરિકા વચ્ચેના સંબંધોમાં ખટાશ આવવાનું સંભવિત કારણ સમજાવતા એક ટોચના અમેરિકન વિદ્વાનએ કહ્યું કે ટ્રમ્પ પોતાને વૈશ્વિક શાંતિ નિર્માતા તરીકે દર્શાવવા માંગે છે અને તેથી જ તેમણે ભારત અને પાકિસ્તાન વચ્ચે યુદ્ધવિરામનો શ્રેય લેવાનો પ્રયાસ કર્યો, પરંતુ જ્યારે પીએમ મોદીએ તેનો ઇનકાર કર્યો અને નોબેલ શાંતિ પુરસ્કાર માટે ટ્રમ્પના નામને સમર્થન ન આપ્યું, ત્યારે ટ્રમ્પે કદાચ તેને વ્યક્તિગત રીતે લીધું અને ખરાબ લાગ્યું.
અમેરિકન શિક્ષણવિદ ટેરિલ જોન્સે કહ્યું કે ’ટ્રમ્પની રણનીતિ એ છે કે પહેલા બે પક્ષો વચ્ચે વાતચીત માટે મોટી શરતો લાદીએ અને પછી તેમને વાટાઘાટો માટે દબાણ કરીએ અને તેઓ હજુ પણ એ જ કરી રહ્યા છે.’ જોન્સે કહ્યું કે ’ટ્રમ્પને આશા હતી કે પીએમ મોદી તેમને નોબેલ શાંતિ પુરસ્કાર માટે પણ નોમિનેટ કરશે, પરંતુ જ્યારે પીએમ મોદીએ તેમ ન કર્યું, ત્યારે ટ્રમ્પે તેને ગંભીરતાથી લીધું અને તેના કારણે ટ્રમ્પે ભારત પર ટેરિફ લાદી દીધો.’
પ્રોફેસર ટેરિલ જોન્સે કહ્યું કે ’ડોનાલ્ડ ટ્રમ્પ વૈશ્વિક નેતા બનવા માંગે છે. માત્ર રાજકીય, આર્થિક જ નહીં પણ ભૂ-રાજકીય રીતે પણ. એટલા માટે તેઓ ભારત અને પાકિસ્તાન વચ્ચે યુદ્ધવિરામનો શ્રેય લેવા માટે ખૂબ જ ઉતાવળમાં હતા. જ્યારે વડા પ્રધાન મોદી તેનો ઇનકાર કરતા રહ્યા અને કહ્યું કે અમને અમેરિકા કે અન્ય કોઈ દેશની પાકિસ્તાન સાથે વાત કરવાની જરૂર નથી. જ્યારે ટ્રમ્પ ઇચ્છતા હતા કે પીએમ મોદી નોબેલ શાંતિ પુરસ્કાર માટે તેમના નામનું સમર્થન કરે, પરંતુ જ્યારે આવું ન થયું, ત્યારે ટ્રમ્પે તેને વ્યક્તિગત રીતે લીધું. જ્યારે ટ્રમ્પ કોઈ વાતને વ્યક્તિગત રીતે લે છે, ત્યારે તે તેના પર પ્રતિક્રિયા આપે છે અને તેમણે ઘણી વાર એમ પણ કહ્યું છે કે ટેરિફ શબ્દ અંગ્રેજી ભાષાનો સૌથી સુંદર શબ્દ છે.
