New Delhi,તા.૨૧
ભારત અને કેનેડા વચ્ચેના તણાવપૂર્ણ સંબંધો વચ્ચે કેનેડા પાછા બોલાવવામાં આવેલા ભારતીય હાઈ કમિશનર સંજય કુમાર વર્માએ આરોપ લગાવ્યો કે ખાલિસ્તાની ઉગ્રવાદીઓ અને આતંકવાદીઓ કેનેડિયન સિક્યોરિટી ઈન્ટેલિજન્સ સર્વિસના જાસૂસ છે. ઈન્ટરવ્યુમાં રાજદૂત સંજય કુમાર વર્માએ કેનેડા સરકાર પર ખાલિસ્તાની ઉગ્રવાદીઓને પ્રોત્સાહિત કરવાનો આરોપ પણ લગાવ્યો છે.
ભારતીય રાજદૂતે કહ્યું કે, ખાલિસ્તાની ઉગ્રવાદીઓને સતત પ્રોત્સાહિત કરવામાં આવે છે. આ મારો આરોપ છે, હું એ પણ જાણું છું કે આમાંના કેટલાક ખાલિસ્તાની ઉગ્રવાદીઓ અને આતંકવાદીઓ સીએસઆઇએસના જાસૂસો છે, ફરીથી હું કોઈ પુરાવા આપી રહ્યો નથી. સંજય કુમાર વર્માએ વધુમાં કહ્યું કે કેનેડાની સરકારે અમારી મુખ્ય ચિંતાઓને ગંભીરતાથી લેવી જોઈએ. તેમણે કહ્યું કે, અમે ફક્ત એટલું જ ઈચ્છીએ છીએ કે વર્તમાન કેનેડાની સરકાર, વર્તમાન સરકાર ઈમાનદારીથી અમારી મુખ્ય ચિંતાઓને સમજે અને જેઓ ભારતીય સાર્વભૌમત્વ અને પ્રાદેશિક અખંડિતતાને પડકારવાનો પ્રયાસ કરી રહ્યાં છે તેમની સાથે મળીને કામ ન કરે. ભારતમાં શું થશે તે ભારતીય નાગરિકો નક્કી કરશે.
તેમણે વધુમાં કહ્યું કે, આ ખાલિસ્તાની ઉગ્રવાદીઓ ભારતીય નાગરિક નથી, તેઓ કેનેડાના નાગરિક છે અને કોઈ પણ દેશે પોતાના નાગરિકોને બીજા દેશની સાર્વભૌમત્વને પડકારવાની મંજૂરી આપવી જોઈએ નહીં. ભારતીય રાજદૂતે ખાલિસ્તાની આતંકવાદી હરદીપ સિંહ નિજ્જરની હત્યાના સંબંધમાં ઓટાવા દ્વારા તેમના પર લગાવવામાં આવેલા તમામ આરોપોને પણ નકારી કાઢ્યા હતા. સંજય વર્માએ પુષ્ટિ કરી કે, આ કેસમાં કોઈ પુરાવા રજૂ કરવામાં આવ્યા નથી, આ બધું રાજકીય રીતે પ્રેરિત છે. હું જોવા માંગુ છું કે તે (વિદેશ મંત્રી મેલાની જોય) કયા નક્કર પુરાવાઓ વિશે વાત કરી રહી છે. તેણે કહ્યું, જ્યાં સુધી મારો સંબંધ છે, તે રાજકીય રીતે વાત કરી રહી છે.
રાજદૂત સંજય વર્માએ નિજ્જર સહિત ખાલિસ્તાની તરફી કાર્યકરો વિશે માહિતી એકત્રિત કરવા માટે વ્યક્તિઓને સૂચના આપવા અથવા દબાણ કરવાના આરોપોને પણ નકારી કાઢ્યા હતા. તેમણે કહ્યું કે, ભારતના હાઈ કમિશનર તરીકે મેં ક્યારેય આવું કંઈ કર્યું નથી. તેમણે કહ્યું કે કેનેડામાં ખાલિસ્તાની તરફી તત્વો પર નજર રાખવી એ રાષ્ટ્રીય હિતનો વિષય છે અને તેમની ટીમ ખુલ્લા સ્ત્રોતોમાંથી માહિતી એકત્રિત કરે છે. આ દરમિયાન સંજય વર્માએ સ્પષ્ટતા કરી કે, અમે અખબારો વાંચીએ છીએ, અમે તેમના નિવેદનો વાંચીએ છીએ, કારણ કે અમે પંજાબી સમજીએ છીએ, તેથી અમે તેમની સોશિયલ મીડિયા પોસ્ટ્સ વાંચીએ છીએ અને ત્યાંથી અનુમાન લગાવવાનો પ્રયાસ કરીએ છીએ.
ભારતીય રાજદૂતનું નિવેદન કેનેડાએ એનઆઇએ-નિયુક્ત આતંકવાદી હરદીપ નિજ્જરની હત્યામાં હાઈ કમિશનર અને અન્ય પાંચ ભારતીય રાજદ્વારીઓને ’હિતના વ્યક્તિઓ’ તરીકે નિયુક્ત કર્યાના દિવસો પછી આવ્યું છે, જેના પગલે ભારતે સંજય વર્મા સહિત છ રાજદ્વારીઓને પાછા બોલાવ્યા છે .
