New Delhiતા.૨૩
ઓસ્ટ્રેલિયાના પૂર્વ ઓપનર ડેવિડ વોર્નરે ભારત અને ઓસ્ટ્રેલિયા સીરીઝ પહેલા મોટું નિવેદન આપ્યું છે. તેણે આગામી શ્રેણી પહેલા ટીમમાં પરત ફરવાની વાત કરી છે. તમને જણાવી દઈએ કે આ અનુભવી ખેલાડીએ આ વર્ષે જાન્યુઆરીમાં આંતરરાષ્ટ્રીય ક્રિકેટને અલવિદા કહી દીધું હતું. જોકે, હવે તેનું મન ડગમગી રહ્યું છે. તે નિવૃત્તિમાંથી પરત ફરવાની તૈયારી કરી રહ્યો છે.
ભારત અને ઓસ્ટ્રેલિયા વચ્ચે ૨૨ નવેમ્બરથી પાંચ મેચની ટેસ્ટ શ્રેણી શરૂ થશે. તેને બોર્ડર-ગાવસ્કર ટ્રોફી તરીકે પણ ઓળખવામાં આવે છે. આગામી સિરીઝ પહેલા ૩૮ વર્ષીય વોર્નરે કહ્યું છે કે જો તેને રમવાની તક મળશે તો તે બિલકુલ મોડું નહીં કરે.
વોર્નરે કોડ સ્પોર્ટ્સને કહ્યું, હું હંમેશા ઉપલબ્ધ છું, તે માત્ર એક કોલ મેળવવાની વાત છે. હું હંમેશા ગંભીર છું. સાચું કહું તો, ખેલાડીઓએ ફેબ્રુઆરીમાં તેમની છેલ્લી ટેસ્ટ મેચ પછી માત્ર એક લાલ બોલની મેચ (શીલ્ડનો પ્રથમ રાઉન્ડ) રમી છે. તેથી મારી તૈયારી લગભગ સમાન છે. જો તેમને આ શ્રેણી (ભારત સામે) માટે ખરેખર મારી જરૂર હોય તો હું આગામી શિલ્ડ મેચ રમવા માટે પણ તૈયાર છું. મેં યોગ્ય કારણોસર નિવૃત્તિ લીધી અને હું રમત પૂરી કરવા માંગતો હતો. પરંતુ જો તેમને કોઈની સખત જરૂર હોય તો હું તૈયાર છું. હું આમાંથી પાછળ હટીશ નહીં.
ડેવિડ વોર્નરનો આ નિર્ણય એવા સમયે આવ્યો છે જ્યારે ઓસ્ટ્રેલિયાના પસંદગીકારો અને ટીમ મેનેજમેન્ટ ઉસ્માન ખ્વાજા માટે ઓપનિંગ પાર્ટનરની શોધમાં છે. ઑક્ટોબરની શરૂઆતમાં, પસંદગી સમિતિના વડા જ્યોર્જ બેઇલીએ પુષ્ટિ આપી હતી કે સ્ટીવ સ્મિથ ઓપનિંગ કરશે નહીં અને તેના નંબર ચાર સ્થાન પર પાછા ફરશે. આ પછી ઓસ્ટ્રેલિયાની ટેસ્ટ ટીમમાં ઓપનરનું સ્થાન ખાલી થઈ ગયું છે.
નિવૃત્તિમાંથી પરત ફરવા અંગે વોર્નરના નિવેદનથી ઓસ્ટ્રેલિયન પસંદગીકારોને રાહતનો શ્વાસ લેવાની તક મળી છે. હવે તમામની નજર પસંદગી સમિતિ પર રહેશે. તે જાણીતું છે કે ઓસ્ટ્રેલિયા એક વિશ્વસનીય ઓપનિંગ બેટ્સમેનની શોધમાં છે. આમાં ૧૯ વર્ષીય સેમ કોન્સ્ટાસ અને અનુભવી માર્કસ હેરિસનું નામ સામે આવી રહ્યું છે.
