સૌરાષ્ટ્રમાં અન્ય સ્થળોએ તડકા-છાંયડા વચ્ચે હળવા ઝાપટા
Bhavnagar ,તા.18
ભાવનગર શહેર જિલ્લામાં ગઇકાલે 05 થી 1.5 ઇંચ વરસાદ વરસ્યો હતો. જયારે સૌરાષ્ટ્રમાં વિવિધ સ્થળોએ તડકા-છાંયડા વચ્ચે છુટાછવાયા હળવા ઝાપટા વરસ્યા હતા. ભાવનગરથી મળતા અહેવાલો મુજબ ભાવનગરમાં અઠવાડિયાના વિરામ બાદ ગઈકાલથી ફરી વરસાદી માહોલ બંધાયો છે. શુક્રવારે બપોર બાદ ભાવનગર શહેરમાં ધોધમાર દોઢ ઇંચ વરસાદ વરસી ગયો હતો. જ્યારે ઘોઘા અને જેસર પંથકમાં પણ વરસાદ પડ્યો હતો.
ગોહિલવાડ પંથકમાં વરસાદનો બીજો રાઉન્ડ શરૂ થયો છે. બપોરે શહેરમાં ધોધમાર વરસાદ તુટી પડ્યો હતો. શહેરમાં દોઢ ઇંચ જેટલો વરસાદ પડી ગયો હતો. જ્યારે ઘોઘા અને જેસર પંથકમાં પણ બપોરે વરસાદ પડ્યો હતો. આજે સવારના 6 વાગે પૂરા થતા છેલ્લા 24 કલાક દરમિયાન ભાવનગર શહેરમાં 36 મી.મી., ઘોઘા માં 9 અને જેસરમાં 9 ઇંચ વરસાદ નોંધાયો છે.
ભાવનગર શહેરનું મહત્તમ તાપમાન 35.2 ડીગ્રી નોંધાયું હતું. જ્યારે લઘુતમ તાપમાન 25.4 ડિગ્રી રહ્યું હતું. વાતાવરણમાં ભેજનું પ્રમાણ 19% રહ્યું હતું. જ્યારે પવનની ઝડપ 12 કિ.મી. પ્રતિ કલાકની રહી હતી.
