Tehran,તા.૧૩
મધ્ય પૂર્વમાં ચાલી રહેલા તણાવ વચ્ચે, ઈઝરાયલે તેના યુદ્ધ ખર્ચની વિગતો પ્રદાન કરી છે. ઈઝરાયલી નાણા મંત્રાલયના જણાવ્યા અનુસાર, ઈઝરાયલે ઈરાન સાથેના યુદ્ધમાં ઓછામાં ઓછા ૧૧.૫ બિલિયન અથવા ૧ લાખ કરોડથી વધુનો ખર્ચ કર્યો છે. ઈઝરાયલના નાણા મંત્રાલયે ઈરાન સાથેના યુદ્ધના ખર્ચનો પ્રારંભિક અંદાજ જાહેર કર્યો છે. વ્યવસાય અને એરપોર્ટ બંધ થવાથી થયેલા નુકસાનનો સમાવેશ કરવાનું બાકી છે.
ઇઝરાયલી નાણા મંત્રાલય અનુસાર, સંરક્ષણ અને લશ્કરી ખર્ચ પર આશરે ૭.૨૫ બિલિયન અથવા ૬૦,૦૦૦ કરોડ રૂપિયાથી વધુ ખર્ચાયા હતા, જેમાં સંરક્ષણ સાધનોની ખરીદી અને ૧૦૦,૦૦૦ થી વધુ અનામત સૈનિકોની તૈનાતીનો સમાવેશ થાય છે.
વધુમાં, મિસાઇલ હુમલાઓ અને અન્ય યુદ્ધ-સંબંધિત પરિબળોથી પ્રભાવિત વ્યવસાયો અને નાગરિકો દ્વારા આશરે ૪ બિલિયન અથવા ૩૭,૦૦૦ કરોડ રૂપિયાથી વધુનો ખર્ચ થયો છે. આમાં કામકાજના દિવસો ગુમાવવાનો પણ સમાવેશ થાય છે.
ઇઝરાયલી નાણા મંત્રાલયે એમ પણ જણાવ્યું હતું કે એરપોર્ટ અને ઘણા વ્યવસાયોના ૪૦ દિવસ બંધ થવા જેવા ચોક્કસ ખર્ચને કારણે થયેલા સંપૂર્ણ આર્થિક નુકસાનનું હજુ સુધી સંપૂર્ણ મૂલ્યાંકન કરવામાં આવ્યું નથી. ભવિષ્યમાં તેની અસર વધુ સ્પષ્ટ થશે.
ઉલ્લેખનીય છે કે ગાઝા સાથેના યુદ્ધની ચરમસીમાએ, ઇઝરાયલ તેના લશ્કરી ખર્ચ પર દર મહિને આશરે ૪.૭ બિલિયન અથવા રૂ. ૪૩,૦૦૦ કરોડથી વધુ ખર્ચ કરી રહ્યું હતું, જે ૭ ઓક્ટોબર, ૨૦૨૩ ના હુમલા પહેલા તેના માસિક બજેટ કરતાં બમણાથી વધુ હતું.
