New Delhi,તા.30
દેશની પ્રાઈવેટ બેંકોમાં AIના વધતા ઉપયોગને કારણે કર્મચારીઓની સંખ્યા ઘટી રહી છે, જ્યારે તેમની શાખાઓ સતત વધી રહી છે. નાણાકીય વર્ષ 2025-26માં પ્રમુખ ખાનગી બેંકો એચડીએફસી, એક્સિસ અને આઈસીઆઈસીઆઈ એ તેમની શાખાઓના નેટવર્કનો વિસ્તાર તો કર્યો છે.
પરંતુ કુલ કર્મચારીઓની સંખ્યામાં ભારે ઘટાડો નોંધ્યો છે. એચડીએફસીના કર્મચારીઓની સંખ્યા નાણાકીય વર્ષ 2025-26માં ઘટીને 2.11 લાખ રહી ગઈ જે નાણાકીય વર્ષ 2024-25 માં 2.14 લાખ હતી.
આ જ રીતે એક્સિસ બેંક, આઈસીઆઈસીઆઈ જેવી બેંકોની નવી બ્રાન્ચ ખુલવા છતાં કર્મચારીઓની સંખ્યા સતત ઘટી છે. યસ બેંક એકમાત્ર એવી પ્રમુખ પ્રાઈવેટ બેંક રહી જ્યાં કર્મચારીઓની સંખ્યામાં વૃદ્ધિ નોંધાઈ હતી. બેંકોએ ઓટોમેશનમાં અબજો ડોલરનું રોકાણ કર્યું છે.
પડકાર હજુ વધશે
બેંકોનું માનવું છે કે વર્તમાનમાં સ્ટાફમાં જે ઘટાડો દેખાઈ રહ્યો છે, તે મુખ્યત્વે ઓટોમેશન અને વર્ક ઓપ્ટિમાઈઝેશનનું પરિણામ છે. બેંક પોતે માની રહી છે કે જ્યારે AI નો સંપૂર્ણ રીતે ઉપયોગ શરૂ થઈ જશે, ત્યારે તેના કર્મચારીઓની સંખ્યા પર ઘણી ઊંડી અસર પડશે.
એટલે કે આવનારા સમયમાં બેંકિંગ સેક્ટરમાં માત્ર એવા જ લોકોની જરૂર પડશે જે આ નવી ડિજિટલ ક્રાંતિ અને AI ટેકનોલોજી સાથે કદમ મિલાવીને ચાલી શકશે. બેંકો ઝડપથી AI માં રોકાણ કરી રહી છે.
બેંકોમાં નવી બ્રાન્ચ અને ઘટેલા કર્મચારીઓ (2025-26)
વર્ષ 2025-26ના ડેટા મુજબ, ખાનગી બેંકોમાં નવી બ્રાન્ચની સંખ્યા વધી રહી છે, પરંતુ તેની સામે કર્મચારીઓની સંખ્યામાં સતત ઘટાડો જોવા મળી રહ્યો છે. આઈસીઆઈસીઆઈ બેંકે સૌથી વધુ 600 નવી બ્રાન્ચ ખોલી છે, છતાં તેના કર્મચારીઓમાં 6,000નો ઘટાડો થયો છે. એક્સિસ બેંકે 399 નવી બ્રાન્ચ ઉમેરી છે અને 3,100 કર્મચારીઓ ઘટાડ્યા છે. એચડીએફસી બેંકે 234 નવી બ્રાન્ચ સામે 3,343 કર્મચારીઓ ઓછા કર્યા છે, જ્યારે RBL બેંકે 42 નવી બ્રાન્ચ શરૂ કરી છે અને 949 કર્મચારીઓ ઘટ્યા છે.
છેલ્લા ત્રણ વર્ષનો સરખામણીનો ડેટા
વર્ષ 2023 થી 2026 ના ગાળામાં વિવિધ બેંકોમાં કર્મચારીઓની સ્થિતિ નીચે મુજબ રહી છે:
આઈસીઆઈસીઆઈ બેંક : 2023-24 માં 1,41,009 કર્મચારીઓ હતા, જે 2024-25 માં 1,30,957 અને 2025-26 માં ઘટીને 1,24,760 થયા છે.
એચડીએફસી બેંક : 2023-24 માં 2,13,527 કર્મચારીઓ હતા, જે 2025-26 ના અંત સુધીમાં ઘટીને 2,11,178 થયા છે.
એક્સિસ બેંક : 2023-24 માં 1,04,000 કર્મચારીઓ હતા, જે 2025-26 માં ઘટીને 1,01,300 થયા છે.
RBL બેંક : 2023-24 માં 12,473 કર્મચારીઓ હતા, જે 2024-25 માં વધીને 14,265 થયા હતા, પરંતુ 2025-26 માં ફરી ઘટીને 13,316 થયા છે.
યસ બેંક : આ ટ્રેન્ડથી વિપરીત, યસ બેંકમાં કર્મચારીઓની સંખ્યામાં વધારો જોવા મળ્યો છે. વર્ષ 2024-25 માં યસ બેંકમાં 28,687 કર્મચારીઓ હતા, જે વર્ષ 2025-26 માં વધીને 29,573 થયા છે.
