(જીજ્ઞેશ પટેલ દ્વારા)
Manavadar તા.૧૧
Manavadar નગરપાલિકા વિસ્તારમાં તંત્ર દ્વારા હાથ ધરવામાં આવેલી દબાણ હટાવો ઝુંબેશ હાલ ભારે વિવાદમાં સપડાઈ છે. વોર્ડ નંબર ૫ ના સ્થાનિક નગરપાલિકા સદસ્ય નિશારભાઈ હુસેનભાઈ ઠેબાએ તંત્રની આ કામગીરી સામે તીખા પ્રહારો કર્યા છે. તેમણે આ સમગ્ર કાર્યવાહીને પક્ષપાતપૂર્ણ અને ગરીબ વિરોધી ગણાવીને તંત્રની દાનત સામે સવાલો ઉઠાવ્યા છે.
સમગ્ર શહેરમાં પેશકદમી છતાં ગરીબોને નિશાન બનાવાયાનો આક્ષેપ સદસ્ય નિશારભાઈ ઠેબાએ આક્રોશપૂર્વક જણાવ્યું હતું કે, સમગ્ર શહેરમાં અનેક મુખ્ય જગ્યાઓ પર મોટા-મોટા ગેરકાયદેસર દબાણો અને પેશકદમીઓ થયેલી છે, જે તંત્રને બિલકુલ નડતી નથી કે દેખાતી નથી. બીજી તરફ, રોજનું કમાઈને રોજ ખાતા ગરીબ અને મધ્યમ વર્ગના નાના વેપારીઓએ દુકાનની બહાર માત્ર સહેજ પતરાં લંબાવ્યા, તો તંત્ર તેને હટાવવા માટે નોટિસો ફટકારી રહ્યું છે અને તોડી પાડવાની ધમકીઓ આપી રહ્યું છે.
ધંધા બંધ કરી વિરોધ કરતા વેપારીઓની પોલીસ દ્વારા અટકાયત તંત્રની આ અન્યાયી કાર્યવાહીથી નારાજ થઈને સ્થાનિક વેપારીઓએ પોતાના રોજગાર સંપૂર્ણપણે બંધ કરી દીધા હતા અને રસ્તા પર બેસીને શાંતિપૂર્ણ વિરોધ શરૂ કર્યો હતો. જો કે, વેપારીઓ જેવા રસ્તા પર ઉતર્યા કે તરત જ પોલીસની ગાડીઓ ઘટનાસ્થળે પહોંચી ગઈ હતી અને આંદોલન કરી રહેલા વેપારીઓની અટકાયત કરીને તેમને પોલીસ સ્ટેશન ભેગા કરી દેવામાં આવ્યા હતા, જેને પગલે બજારમાં તંગદિલી વ્યાપી ગઈ છે.
શાસક પક્ષ અને સરકારની નીતિઓ પર આકરા પ્રહારો નગરપાલિકાના સદસ્યે વર્તમાન ભાજપ સરકારની નીતિઓ પર આકરા પ્રહારો કરતા કહ્યું હતું કે, શાસક પક્ષની રહેમનજર હેઠળ ગેરકાયદેસર કે બે નંબરના ધંધા કરનારાઓને બધી જ છૂટછાટો આપવામાં આવે છે, જ્યારે કાયદેસર રીતે મહેનત મજૂરી કરીને પેટ ગુજારતા નાના વેપારીઓને હેરાન કરવામાં આવે છે. તંત્રનો આ કેવો ન્યાય છે તે સમજાતું નથી.
આગામી સમયમાં ઉગ્ર આંદોલનની ચીમકી અંતમાં નિશારભાઈ ઠેબાએ વેપારીઓને ન્યાય અપાવવા માટે છેલ્લે સુધી લડત આપવાની ખાતરી ઉચ્ચારી હતી. તેમણે સ્પષ્ટ શબ્દોમાં જણાવ્યું કે, તેઓ ગરીબ વેપારીઓ સાથે અડગ રહીને ઊભા છે અને આગામી સમયમાં જ્યાં પણ તેમની જરૂર પડશે, ત્યાં તેઓ ખડા પગે રહીને તંત્ર સામે અવાજ ઉઠાવશે. આ મામલે હવે સ્થાનિક રાજકારણમાં ગરમાવો આવી ગયો છે.
