Dahod,તા.11
દાહોદ તાલુકાના ખરેડી જીઆઈડીસીમાં ખાનગી માલિકીના એક પ્લોટમાં ધમધમતા ન્યુ બાબજી એન્ટરપ્રાઈઝ નામની ફેકટરીમાં આધાર પુરાવા વગર રિફિલિંગ કરેલા ખોટા નામ વાળી અલગ અલગ બ્રાન્ડના રૂપિયા 1,17,309/- ઉપરાંતની કિંમતના ખાદ્યતેલના પાઉચ, ડબ્બાઓ તથા બોટલો તેમજ શંકાસ્પદ પામોલીન તેલનો જથ્થો અલગ અલગ બ્રાન્ડના સ્ટીકરો તથા છોટા હાથી ગાડી મળી કુલ રૂપિયા 15,45,290/-ની કિંમતનો શંકાસ્પદ મુદ્દામાલ દાહોદ એસઓજી પોલીસે રેડ દરમિયાન ઝડપી પાડી કબજે કરી વધુ તપાસ હાથ ધરી છે.
દાહોદ જિલ્લામાં નકલી કચેરી, એન.એ. ના નકલી હુકમ બાદ હવે ખોટા નામવાળી અલગ અલગ બ્રાન્ડના સ્ટીકરો લગાવી શંકાસ્પદ પામોલીન તેલનું રિફિલિંગ કરવાનું રેકેટ બહાર આવતા તંત્ર ચોંકી ઉઠયું છે.
શહેરના ગોદી રોડ, ઉકરડી રોડ પર નૂર મહોલ્લા ખાતે રહેતા મુરતુજાભાઈ કુત્બુદીન ઝાબુઆવાલાની માલિકીના ખરેડી જીઆઈડીસી વિસ્તારમાં આવેલા પ્લોટ નંબર 525માં ચાલતી ન્યુ બાબજી એન્ટરપ્રાઈઝ નામની ફેકટરીમાં શંકાસ્પદ પામોલીન તેલનું મોટાપાયે રેકેટ ચાલતું હોવાની બાતમી દાહોદ એસ.ઓ.જી. પોલીસને મળી હતી.
આ આધારે દાહોદ એસ.ઓ.જી. ટીમે ખરેડી જીઆઈડીસીમાં આવેલ ન્યુ બાબજી એન્ટરપ્રાઈઝ નામના કારખાનામાં ઓચિંતો છાપો માર્યો હતો અને કોઈપણ પ્રકારના આધાર પુરાવા વગર રિફિલિંગ કરેલ બ્રાન્ડના તેલના પાઉચ 456, તથા પતરાના તેલના ડબ્બા 100, તેમજ બોટલ નંગ 24 મળી, 1,17,200નો તેલનો જથ્થો તેમજ 17 જેટલી બ્રાન્ડના કુલ સ્ટીકરો 425 તેમજ સ્થળ પરથી જીજે.20.એ.ટી.2198 નંબરની ગાડીમાંથી 27090ની કુલ 15 કિલોના 104 ડબ્બા ભરેલ 1505 કિલોગ્રામ શંકાસ્પદ પામોલીન તેલ (વેસ્ટ ઓઈલ) તથા કાચા બિલ નંગ 2 તથા ખાલી બેરલ નંગ 05 તેમજ 25 હજાર લીટરના ટાંકામાં આશરે રૂપિયા 12 લાખની કિંમતનું 10000/- લીટર પામોલીન તેલ અને 2 લાખનો છોટા હાથી મળી કુલ રૂપિયા 15,45,290/-નો શંકાસ્પદ જથ્થો કબ્જે લીધો હતો.
