Jerusalem,તા.૩
ગાઝા પટ્ટીમાં ઇઝરાયલનું લશ્કરી ઓપરેશન વિસ્તરી રહ્યું છે, એમ સંરક્ષણ પ્રધાન ઇઝરાયલ કાત્ઝે જણાવ્યું હતું. તેમણે કહ્યું કે પેલેસ્ટિનિયન ક્ષેત્રમાં આ હુમલો આતંકવાદીઓ અને તેમના માળખાગત સુવિધાઓનો નાશ કરવા માટે કરવામાં આવી રહ્યો છે. આ કાર્યવાહી મોટા વિસ્તારોને કબજે કરી રહી છે જે ઇઝરાયલના સુરક્ષા ક્ષેત્રમાં ઉમેરવામાં આવશે. નાસિર હોસ્પિટલના અધિકારીઓના જણાવ્યા અનુસાર, ખાન યુનિસ શહેર પર રાત્રે થયેલા હવાઈ હુમલામાં ૧૭ લોકો માર્યા ગયા.
કાત્ઝે જણાવ્યું હતું કે, ઇઝરાયલની સુરક્ષા પરિમિતિ ઉત્તર અને પૂર્વીય ગાઝામાં સરહદ સાથે ચાલે છે અને દાયકાઓથી દેશના સંરક્ષણનો મહત્વપૂર્ણ ભાગ રહી છે. તેનો ઉપયોગ વિસ્તારની નજીક રહેતા તેના નાગરિકોને સુરક્ષિત રાખવા માટે થાય છે.
સંરક્ષણ પ્રધાન કાત્ઝે ગાઝાવાસીઓને હમાસને હાંકી કાઢવા અપીલ કરી, જેણે હજુ પણ ૫૯ લોકોને બંધક બનાવ્યા છે. આ બંધકોમાંથી, ૨૪ હજુ પણ જીવંત હોવાનો અંદાજ છે. જોકે, બાકીના બંધકોને યુદ્ધવિરામ અને અન્ય કરારો હેઠળ મુક્ત કરવામાં આવ્યા છે. કાત્ઝે બાકીના બંધકોને પરત કરવા કહ્યું.
ઇઝરાયલે દક્ષિણ ગાઝા પટ્ટીના ખાન યુનિસ શહેર પર રાત્રે હવાઈ હુમલા શરૂ કર્યા. આ હુમલાઓમાં ૧૭ લોકો માર્યા ગયા હતા. અધિકારીઓએ બુધવારે જણાવ્યું હતું કે હવાઈ હુમલામાં માર્યા ગયેલા ૧૨ લોકોના મૃતદેહ નાસિર હોસ્પિટલમાં લાવવામાં આવ્યા હતા. મૃતકોમાં પાંચ મહિલાઓ અને બે બાળકોનો સમાવેશ થાય છે. મૃતકોમાંથી એક મહિલા ગર્ભવતી હતી. અધિકારીઓએ જણાવ્યું હતું કે આ હુમલામાં એક જ પરિવારના ત્રણ પુરુષો માર્યા ગયા હતા. જે ઘર પર બોમ્બમારો થયો હતો તેના માલિકનું પણ મૃત્યુ થયું. વધુમાં, ગાઝા યુરોપિયન હોસ્પિટલને બે અલગ અલગ હવાઈ હુમલામાં માર્યા ગયેલા પાંચ લોકોના મૃતદેહ મળ્યા.
સંયુક્ત રાષ્ટ્રએ ઇઝરાયલના દાવાને “હાસ્યાસ્પદ” ગણાવ્યો કે ગાઝામાં લાંબા ગાળા માટે ખોરાકની ઉપલબ્ધતા છે. સંયુક્ત રાષ્ટ્રએ કહ્યું કે ગાઝામાં ખાદ્ય સંકટ ખૂબ જ ગંભીર છે. યુએનના પ્રવક્તા સ્ટીફન ડુજારિકે જણાવ્યું હતું કે વર્લ્ડ ફૂડ પ્રોગ્રામને ગાઝામાં તેની બધી ૨૫ બેકરીઓ બંધ કરવી પડી હતી કારણ કે તેમની પાસે રસોઈ માટે બળતણનો અભાવ હતો. ડુજારિકે જણાવ્યું હતું કે ઇઝરાયલે એક મહિના પહેલા ગાઝામાં પ્રવેશતા તમામ ક્રોસિંગ બંધ કરી દીધા હતા, જેના કારણે માનવતાવાદી પુરવઠો બંધ થઈ ગયો હતો.
