New Delhi,તા.22
ભારતીય વિદ્યાર્થીઓનું અમેરિકા, યુકે, કેનેડા અને ઓસ્ટ્રેલિયા (મોટા ચાર દેશો) પ્રત્યેનું આકર્ષણ ઘટી રહ્યું છે. હવે તેઓ જર્મની, આયર્લેન્ડ, ન્યૂઝીલેન્ડ અને રશિયા પણ પોતાની સુવર્ણ કારકિર્દીનું સપનું પૂરું કરવા માટે જઈ રહ્યાં છે. બિગ 4 દેશોમાં ઉચ્ચ શિક્ષણનો ખર્ચ પણ ઘણો ઉંચો છે. આ દેશોની સરખામણીએ જર્મની અને ફ્રાન્સ જેવાં દેશોમાં રહેવાનો ખર્ચ યુનિવર્સિટીનો ખર્ચ પણ ઓછો છે.
છેલ્લાં ત્રણ વર્ષમાં ડોલર સામે રૂપિયો નબળો પડતાં વિદેશમાં અભ્યાસનો ખર્ચ વધુ વધ્યો છે. વધતી મોંઘવારીની અસર શિક્ષણના ખર્ચ પર પણ પડે છે. વિદેશથી ઉચ્ચ શિક્ષણનો સરેરાશ વાર્ષિક ખર્ચ 10 થી 80 લાખ રૂપિયા વચ્ચે છે.
આ હોવા છતાં, એચએસબીસી ક્વોલિટી ઓફ લાઇફ સર્વે અનુસાર, દેશનાં 78 ટકા સમૃદ્ધ લોકો ઇચ્છે છે કે તેમનાં બાળકો વિદેશમાંથી ઉચ્ચ શિક્ષણ મેળવે. પરંતુ સારા નાણાંકિય આયોજન વગર આ સ્વપ્ન એક મોંઘા દુ:સ્વપ્નમાં ફેરવાઈ શકે છે. આવી સ્થિતિમાં, નિષ્ણાતો કહે છે કે બાળકોનાં શિક્ષણ માટે રોકાણ ખૂબ વહેલું શરૂ કરવું જોઈએ.
એડુફંડના સીઈઓ ઈલા દુબેએ જણાવ્યું હતું કે, “માત્ર એજ્યુકેશન લોન પર આધાર રાખવો એ ડહાપણભર્યું નથી. તેમણે કહ્યું કે ઘણા માતાપિતા તેમનાં બાળકોનાં શિક્ષણમાં નિવૃત્તિ બચત મૂકે છે. આ પણ એક ખોટું પગલું છે, કારણ કે તમે શિક્ષણ માટે લોન લઈ શકો છો, પરંતુ નિવૃત્તિ માટે કોઈ લોન ઉપલબ્ધ નથી જે તમારી મરણ મુડી છે.
બેંકબજારના સીઈઓ અધિલ શેટ્ટીએ જણાવ્યું હતું કે, “જો તમે 30 વર્ષના છો અને તમારા બાળકના શિક્ષણ માટે રોકાણ કરવા માંગો છો, તો ઇક્વિટી મ્યુચ્યુઅલ ફંડ્સ, ઇએલએસએસ વગેરેમાં દર મહિને રોકાણ કરો, જેમાં છેલ્લાં 10 વર્ષમાં સરેરાશ વળતર 12 ટકાથી વધુ આપ્યું છે.”
હવે તમે એસઆઈપી દ્વારા જેટલી રકમનું રોકાણ કરશો તેટલી જ વધુ સુવિધા તમને બાળકનાં ઉચ્ચ શિક્ષણ સમયે મળશે. જો કે, જો તમે મોડેથી રોકાણ કરવાનું શરૂ કર્યું છે, તો પછી ઇક્વિટી સાથે ડેટ, ગોલ્ડ વગેરેમાં રોકાણ કરો. માત્ર બેંક એફડી – ફિક્સ્ડ ઇન્કમ સેવિંગ્સ સ્કીમ્સ અને ડેટ ફંડ્સ – શૈક્ષણિક ફુગાવાને હરાવવા માટે સક્ષમ નથી.
જે લોકો વિદેશમાં બાળકોને શિક્ષિત કરવા માંગે છે તેઓ એલઆરએસ યોજના હેઠળ વિદેશી શેરો અને ભંડોળમાં રોકાણ કરી શકે છે. એજ્યુકેશન લોન : જો તમે બાળકોનાં શિક્ષણ માટે બચત અને રોકાણ કરવામાં સક્ષમ નથી તો તમે સરકારી બેંકો પાસેથી સસ્તા દરે શિક્ષણ લોન મેળવી શકો છો. આ વર્ષે એજ્યુકેશન લોનમાં લગભગ 20 ટકાનો વધારો થયો છે.
