Srinagar,તા.૧૩
જમ્મુ અને કાશ્મીરના મુખ્યમંત્રી ઓમર અબ્દુલ્લાએ ઈરાન પર ઈઝરાયલના હુમલાની આકરી ટીકા કરી. તેને “સંપૂર્ણપણે ગેરવાજબી” ગણાવતા, તેમણે કહ્યું કે ઈસ્લામિક રિપબ્લિક ઓફ ઈરાને ઈઝરાયલને તેના પર હુમલો કરવા માટે કોઈ કારણ આપ્યું નથી. અબ્દુલ્લાએ આ હુમલા પર વિશ્વ શક્તિઓના મૌનને પણ દુર્ભાગ્યપૂર્ણ ગણાવ્યું.
શ્રીનગરમાં પત્રકારો સાથે વાત કરતા અબ્દુલ્લાએ કહ્યું કે જ્યાં સુધી મારી જાણકારી છે, ઈરાને ઈઝરાયલ સામે કોઈ પણ પ્રકારની લડાઈ કાર્યવાહી કરી નથી. આમ છતાં, ઈઝરાયલે પોતાની મરજીથી ઈરાન પર હુમલો કર્યો અને તેને પૂર્વનિર્ધારિત કાર્યવાહી ગણાવી, જે સંપૂર્ણપણે અન્યાયી છે.
તેમણે કહ્યું, “જો રશિયાનો યુક્રેન પર હુમલો ખોટો છે અને સમગ્ર વિશ્વમાં તેની પ્રતિક્રિયા છે, તો ઈઝરાયલનો ઈરાન પર હુમલો પણ એટલો જ ખોટો અને નિંદનીય છે.”શુક્રવારે ઈઝરાયલે તેહરાન પર હુમલો કર્યો અને ઈરાનના પરમાણુ કાર્યક્રમને નિશાન બનાવ્યો. આ ઘટનાએ મધ્ય પૂર્વના બે કટ્ટર હરીફો વચ્ચે સંપૂર્ણ યુદ્ધનો ભય વધુ ઘેરો બનાવ્યો છે.
અબ્દુલ્લાએ કહ્યું કે આ હુમલાની અસર ફક્ત ઈરાન અને ઇઝરાયલ સુધી મર્યાદિત નહીં રહે, પરંતુ સમગ્ર વિશ્વને અસર કરશે. તેમણે કહ્યું કે, તેની અસર આપણા દેશ પર પણ પડશે. ભલે તે ઇંધણના ભાવ હોય, શેરબજાર હોય કે પશ્ચિમ તરફની ફ્લાઇટ્સ હોય, તે દરેકને અસર કરશે. આનાથી લોકોની લાગણીઓને પણ ઠેસ પહોંચશે.
તેમણે વિદેશ મંત્રાલયને ઈરાનમાં ફસાયેલા કાશ્મીરી વિદ્યાર્થીઓની સલામતી સુનિશ્ચિત કરવા અપીલ કરી. તેમણે સોશિયલ મીડિયા પ્લેટફોર્મ એકસ (અગાઉ ટિ્વટર) પર લખ્યું કે, ઈરાનમાં ફસાયેલા કાશ્મીરી વિદ્યાર્થીઓની સલામતી અને સુખાકારી સુનિશ્ચિત કરવા માટે વિદેશ મંત્રાલયને તાત્કાલિક વિનંતી કરવામાં આવી છે. તેમના પરિવારો ખૂબ જ ચિંતિત છે અને અમે તેમની સાથે ઉભા છીએ. વિદ્યાર્થીઓની સલામતી માટે દરેક જરૂરી પગલાં લેવા જોઈએ.
આ દરમિયાન, ઓમર અબ્દુલ્લાએ ગુરુવારે અમદાવાદમાં થયેલા વિમાન દુર્ઘટના પર પણ ઊંડી સંવેદના વ્યક્ત કરી. લંડન જતી એર ઇન્ડિયા ફ્લાઇટમાં ૨૪૨ મુસાફરોમાંથી ૨૪૧ ના મોત થયા. તેમણે કહ્યું કે, આ ખૂબ જ દુઃખદ ઘટના છે. અમે શોકગ્રસ્ત પરિવારો પ્રત્યે સંવેદના વ્યક્ત કરીએ છીએ અને આશા રાખીએ છીએ કે અકસ્માતના કારણોની તપાસ ટૂંક સમયમાં કરવામાં આવશે જેથી ભવિષ્યમાં આવી ઘટનાઓને અટકાવી શકાય.
