Mehsana,તા.૧૪
Mehsanaના ખેરવા ગામે ભરબપોરે આધેડની આંખમાં મરચાની ભુકી નાખી હાથમાં છરો ભોંકી દઈ બે શખ્સો સોનાનાં-ઘરોણાં અને રોકડ મળી રૂ.૧૧.૭૦ લાખની મત્તા લૂંટી જતાં ચકચાર મચી ગઈ છે.
ખેરવા ગામની ઓઝોન સોસાયટીમાં રહેતા અને લાટી ચલાવતા રમેશભાઈ ગોવિંદભાઈ પટેલે (ઉં.વ.૫૮) અષાઢી બીજે વતન કચ્છ જવાનું હોવાથી સોમવારે બપોરે પોણા બે વાગ્યે ગામમાં આવેલી ખેરવા કો-ઓપરેટિવ ક્રેડિટ સોસાયટી લિ.માં પોતાના લોકરમાંથી ૮.૫ તોલા સોનાનાં ઘરેણાં અને રૂ.૧.૫૦ લાખ રોકડ કાઢી હતી. ઘરેણાં અને રોકડ બેગમાં મુકી તેઓ બાઈક લઈને ઘરે જઈ રહ્યા હતા ત્યારે થોડે દૂર ગામના ચોકની એક ગલીના નાકે અચાનક બાઈક લઈને સામે આવેલા આશરે ૨૦થી ૨૫ વર્ષની ઉંમરના બે શખ્સોએ તેમને રોકીને તેમની આંખોમાં મરચાની ભુકી નાખી દીધી હતી.
પરિસ્થિતિ પામી ગયેલા રમેશભાઈએ બેગનો પટ્ટો મજબૂતીથી પકડી લેતાં લૂટારાઓએ છરાથી પટ્ટો કાપી નાખ્યો હતો. જેથી રમેશભાઈએ બેગનું હેન્ડલ પકડીને પ્રતિકાર કરતાં લૂટારાએ તેમના ડાબા હાથના કાંડાથી ઉપરના ભાગે છરો ભોંકી દીધો હતો. જે હાથમાં આરપાર થઈ ગયો હતો. જેથી બેગની પક્કડ છૂટી જતાં લૂટારાઓ સોનાનાં ઘરેણાં અને રૂ.૧.૫૦ લાખની રોકડ ભરેલી બેગ લૂંટીને ફરાર થઈ ગયા હતા. લોહીલુહાણ હાલતમાં રમેશભાઈએ બુમાબુમ કરતાં નજીકમાં પાર્લર ચલાવતા બળદેવભાઈ પટેલ સહિત લોકો દોડી આવ્યા હતા અને તેમને સારવાર માટે મહેસાણાની ખાનગી હોસ્પિટલમાં લઈ આવ્યા હતા.
ભરબપોરે થયેલી હિંસક લૂંટના પગલે મહેસાણા તાલુકા પીઆઈ જે.જી.અમીન અને એલસીબી પીઆઈ એ.એમ.કામળિયાએ પોલીસ કાફલા સાથે ઘટનાસ્થળે પહોંચીને ઘટનાસ્થળ આસપાસના સીસીટીવી ફૂટેજ, પૂછપરછ વગેરેના આધારે લૂટારાઓને ઝડપી લેવાના પ્રયાસો શરૂ કર્યા હતા. તો પીએસઆઈ બી.આર.પટેલે હોસ્પિટલમાં દાખલ રમેશભાઈના નિવેદન આધારે અજાણ્યા શખ્સો સામે ગુનો દાખલ કર્યો હતો.
