Junagadh,તા.18
આવતીકાલે વિસાવદર વિધાનસભાની પેટા ચૂંટણીનું મતદાન થવાનું છે તે પૂર્વે ગઈકાલે હીન્ન કક્ષાની શરમ આવે તેવી ઘટના ઘટવા પામી હતી. ‘આપ’ના ઉમેદવાર ખરાબ છે તેવું આપના આગેવાન પાસે બોલાવવા રૂપિયાના બંડલોની લાણી કરવામાં આવી હતી.
આ સમગ્ર મામલે આપના ઉમેદવારે પોતે જાતે સ્ટિંગ ઓપરેશન કરી ભાજપ કોંગીની મીલીભગત હોવાનો ઘટસ્ફોટ કર્યો હતો. વિસાવદરની એક હોટલમાં કોંગીના પૂર્વ ધારાસભ્ય લલીત વસોયા, લલીત કગથરાએ ભાજપના પૈસે સમગ્ર કારસો રચ્યો હતો. જેની ચૂંટણીપંચ અને પોલીસ સુધી મામલો પહોંચ્યો હતો.
આમ આદમીના ઉમેદવાર ગોપાલ ઈટાલીયાએ ભાજપ અને કોંગ્રેસની મીલીભગતનું લાઈવ સ્ટીંગ ઓપરેશન કયું હતું. આમ આદમી પાર્ટીના વિસાવદર તાલુકાના પ્રમુખ મહેન્દ્ર ડોબરીયાએ બે ત્રણ દિવસ પહેલા આપમાંથી રાજીનામું આપી ગોપાલ ઈટાલીયા વિરૂધ્ધ વિડીયો બનાવ્યો હતો.
મહેન્દ્ર ડોબરીયા દ્વારા આપના એક બાદ એક હોદેદારોને વોટસએપ કોલ કરી ગોપાલ ઈટાલીયા વિરૂધ્ધ વીડિયો બનાવવા આપમાંથી રાજીનામુ આદી દેવા અને તેના બદલામાં એકથી પાંચ લાખ મેળવવાની ઓફર કરવામાં આવી હતી.
આવા એક વોટસઅપ કોલનું તો સ્ક્રીન રેકોડીંગ પણ વાયરલ થયું છે. આપના તાલુકા મહામંત્રી હરદેવ વિકમાને મહેન્દ્ર ડોબરીયાએ ફોન કરી તેમની સાથે જોડાવવાની વાત કરી હતી. તેના બદલામાં રૂા.5 લાખ નકકી કરાયા હતા.
આ અંગે હરદેવભાઈએ આપના આગેવાનોને જાણ કરી હતી અને સમગ્ર મામલે સ્ટીંગ ઓપરેશન કરવાનું નકકી કર્યું હતું. આપના તાલુકા મહામંત્રીને પૈસા આપતા પહેલા ગોપાલ ઈટાલીયા ભાજપ સાથે મળેલો છે તેવો વીડિયો બનાવવાનો અને હાલ આપમાંથી રાજીનામું આપી દેવાનું છે તેવી શરત રાખવામાં આવી હતી.
આ સમગ્ર ઘટનાનું 19 મીનીટનું સ્ટીંગ ઓપરેશન સોશ્યલ મીડીયા પર લાઈવ ચાલુ રાખવામાં આવ્યું હતું. આ દરમ્યાન અન્ય વ્યકિતએ પણ લાઈવ શરૂ કર્યું અને તે સાયોના હોટલના રૂમ નં.201માંથી ધોરાજીના પૂર્વ ધારાસભ્ય લલીત વસોયાએ હોટલના રૂમમાંથી બહાર નીકળીને ચાલતી પકડી લીધી હતી.
ઉપરાંત હોટલના 205 રૂમમાં આવું જ કંઈક ખાનગી ચાલતુ હોવાથી ત્યાં દરવાજો ખટખટાવતા કેટલીવાર સુધી દરવાજો ખોલ્યો નહીં બાદ હોટલના માલીકે અહીં આવી પ્રવૃતિઓ ન કરવાનું કહેતા લાઈવ બંધ કરી દીધુ હતું.
ત્યારબાદ આપના ઉમેદવાર અને જૈને પૈસા આપવામાં આવ્યા તે વ્યકિત સહિતનો કાફલો તાત્કાલીક પ્રાંત કચેરીએ ચુંટણી અધિકારી પાસે દોડી ગયા હતા. જયાં લેખીત રજુઆત કરી હતી. બાદ પોલીસ સ્ટેશને જઈ ફરીયાદ કરી જવાબદારો સામે પગલા લેવાની માંગ કરવામાં આવી હતી.
બારીમાંથી કુદયા: આમ આદમી પાર્ટીના આગેવાનો દ્વારા હોટલ સાયોના હોટલમાંથી સ્ટીંગ ઓપરેશન કરવામાં આવ્યું હતું. ત્યારે હોટલના રૂમ નં. 205માં આપમાંથી રાજીનામુ આપી દીધેલા મહેન્દ્ર ડોબરીયા ડરના માર્યા હોટલની રૂમની બારીમાંથી પાછળની સાઈડની ખુલ્લી જગ્યા ખેતરમાં કુદીને ઉભી પુછડીયે ભાગ્યા હતા.
આ અંગે આપના આગેવાનોએ દલાલ ઉભો રહે કયાં ભાગીને જા છો તેવા સવાલો પુછતા તે દોડતો દોડતો ભાગી રહ્યાના દ્રશ્યો સોશ્યલ મીડીયામાં વાયરલ થયા છે.
કઈ રીતે સ્ટીંગ ઓપરેશન થયું
ગઈકાલે બપોરના આપના ગોપાલ ઈટાલીયાએ પોતાના તથા આપના સોશ્યલ મીડીયાના પ્લેટફોર્મ પર લાઈવ સ્ટીંગ ઓપરેશન શરૂ કર્યું હતું. જેમાં હરદેવભાઈના પેન્ટ શર્ટના તમામ ખીસ્સા ખાલી કરાવડાવી માંડવડ રોડ પરની હોટલ શાયોનામાં મોકલ્યા હતા.
પોતે લાઈવ શરૂ રાખી અન્ય કારમાં તેની પાછળ જઈ હોટલ પર રોકાયા હતા ત્યાં થોડીવારમાં હરદેવભાઈ હોટલમાંથી બહાર નીકળી તેમને આપવામાં આવેલા 500ની નોટોના ચાર બંડલ એટલે કે બે લાખ કાઢી ગોપાલ ઈટાલીયાને આપ્યા હતા.
