Ahmedabad,તા.૧૮
શહેરના રખિયાલ વિસ્તારમાં ડ્રગ્સના દૂષણ સામે ચાલી રહેલી પોલીસની ઝુંબેશ અંતર્ગત એક મોટી સફળતા મળી છે. રખિયાલ પોલીસે બાતમીના આધારે મોમીન મસ્જિદ નજીક આવેલા એક રહેણાંક મકાન પર ઓચિંતો દરોડો પાડતા ૯૨. ૫ ગ્રામ એમડી ડ્રગ્સનો જથ્થો ઝડપાઈ ગયો છે. આ કાર્યવાહી દરમિયાન પોલીસે આરોપી મોઇનુદ્દીન શેખની ધરપકડ કરી વધુ તપાસ હાથ ધરી છે.
રખિયાલ પોલીસને ગઈકાલે રાત્રે મળેલી ગુપ્ત માહિતીના આધારે પોલીસે તાત્કાલિક અસરથી મોમીન મસ્જિદ પાસેના એક મકાનમાં તપાસ કરી હતી. આ તપાસ દરમિયાન આરોપી મોઇનુદ્દીન શેખના મકાનમાંથી ૯૨. ૫ ગ્રામ એમડી ડ્રગ્સ, બે ઈલેક્ટ્રોનિક વજન કાંટા અને બે મોબાઈલ ફોન કબજે કરવામાં આવ્યા હતા.
પોલીસની પ્રાથમિક તપાસમાં બહાર આવ્યું છે કે, આરોપી મોઇનુદ્દીન શેખ અબ્દુલ મારીફ અન્સારી પાસેથી આ ડ્રગ્સનો જથ્થો લાવતો હતો અને ત્યારબાદ તે છૂટક ગ્રાહકોને વેચાણ કરતો હતો. છેલ્લા બે મહિનાથી તે ડ્રગ્સના આ ખતરનાક વ્યવસાયમાં સક્રિય હતો. આરોપીએ પૂછપરછમાં કબૂલાત કરી છે કે તે ઝડપથી અને વધુ પૈસા કમાવવાની લાલચમાં આ ડ્રગ્સના નેટવર્કમાં જોડાયો હતો. પોલીસે હવે આ ડ્રગ્સના મુખ્ય સપ્લાયર અબ્દુલ મારીફ અન્સારી અને અન્ય સંડોવાયેલા ઈસમોને ઝડપી પાડવા માટે તપાસનો ધમધમાટ શરૂ કર્યો છે.
