New Delhi,તા.28
નાણામંત્રી નિર્મલા સીતારમણે શુક્રવારે જાહેર ક્ષેત્રની બેંકોને આરબીઆઈ દ્વારા વ્યાજ દરમાં 50 બેસિસ પોઈન્ટના મોટા ઘટાડાનો લાભ લેવા કહ્યું. મળતો માહિતી મુજબ, જાહેર ક્ષેત્રની બેંકોના નાણાકીય પ્રદર્શનની સમીક્ષા કરવા માટે યોજાયેલી બેઠક દરમિયાન, નાણામંત્રી સીતારમણે તેમના અધિકારીઓને FV26 માં પણ નફાકારકતાની ગતિ જાળવી રાખવા કહ્યું.
નાણાકીય વર્ષ 25 માં 12 જાહેર ક્ષેત્રની બેંકોનો કુલ નફો વધીને રેકોર્ડ રૂ. 1.78 લાખ કરોડ થયો. ગયા વર્ષની સરખામણીમાં આ 26 ટકાનો વધારો છે. નાણાકીય વર્ષ 25 માં, એક વર્ષમાં નફો લગભગ રૂ. 37,100 કરોડનો વધ્યો.
નાણામંત્રીએ આશા વ્યક્ત કરી હતી કે RBI દ્વારા વ્યાજ દરમાં 50 બેસિસ પોઈન્ટનો ઘટાડો કરવામાં આવ્યા બાદ જાહેર ક્ષેત્રની બેંકોની ક્રેડિટ ગ્રોથ (લોન આપવાની ગતિ)માં સુધારો થશે. બેંકોને નિર્દેશ આપવામાં આવ્યો છે કે ચાલુ નાણાકીય વર્ષ 25 ના ક્રેડિટ ગ્રોથ સ્તરને જાળવી રાખવા અથવા વધારવાનો પ્રયાસ કરે.
તમને જણાવી દઈએ કે 6 જૂને, RBI એ બેન્ચમાર્ક રેપો રેટમાં 50 બેસિસ પોઈન્ટનો ઘટાડો કરીને 5.5 ટકા કર્યો હતો. RBI એ કેશ રિઝર્વ રેશિયો (CRR) ને પણ 100 બેસિસ પોઈન્ટ ઘટાડીને હપ્તામાં 3 ટકા કર્યો હતો. આનાથી બેંકિંગ સિસ્ટમમાં પહેલાથી જ હાજર વધારાની તરલતામાં 2.5 લાખ કરોડ રૂપિયાનો ઉમેરો થશે.
નાણાં મંત્રીએ એ વાત પર પણ ભાર મૂક્યો કે, બેંકોએ નાણાકીય સમાવેશ વધારવા માટે સરકારી યોજનાઓમાં વધુને વધુ ગ્રાહકોનો સમાવેશ કરવો જોઈએ. બેઠક દરમિયાન, બેંકોના વિવિધ વિભાગોની સંપૂર્ણ સમીક્ષા કરવામાં આવી.
આ સાથે, કિસાન ક્રેડિટ કાર્ડ, પીએમ મુદ્રા અને ત્રણ સામાજિક સુરક્ષા યોજનાઓ પ્રધાનમંત્રી જીવન જ્યોતિ વીમા યોજના (PMJJEY), પ્રધાનમંત્રી સુરક્ષા વીમા યોજના (PMSBY) અને અટલ પેન્શન યોજના (APY) જેવી સરકારી યોજનાઓમાં થયેલી પ્રગતિની પણ સમીક્ષા કરવામાં આવી.
આ ઉપરાંત, બેંકોને વધુને વધુ ’ઓછી કિંમતની થાપણો’ એકત્ર કરવાના માર્ગો પર કામ કરવાની સલાહ પણ આપવામાં આવી હતી. સંપત્તિ ગુણવત્તાના સંદર્ભમાં, નાણામંત્રીએ બેંકિંગ ક્ષેત્રમાં નોન-પર્ફોર્મિંગ એસેટ્સ (NPA) ના નીચા સ્તરની પ્રશંસા કરી અને વિશ્વાસ વ્યક્ત કર્યો કે બેંકોનું ટોચનું સંચાલન તેને આ નીચા સ્તરે જાળવી રાખશે.
