New Delhi તા.30
કેન્દ્રીય ગૃહમંત્રી અમિત શાહ પર અભદ્ર ટિપ્પણી મામલે તૃણમૂલ કોંગ્રેસના સાંસદ મહુઆ મોઇત્રા વિવાદમાં સપડાયા છે. ભારતીય જનતા પાર્ટીએ આરોપ લગાવ્યો છે કે મોઇત્રાએ શાહનું ‘માથું કાપવાની’ વાત કરી છે. આ મામલો એવા સમયે સામે આવ્યો છે જ્યારે બિહારમાં પીએમ મોદીની માતા ઉપર અપશબ્દો બોલાયા હતા.
તૃણમૂલ કોંગ્રેસના સાંસદ મહુઆ મોઇત્રાએ કેન્દ્રીય ગૃહમંત્રી અમિત શાહ વિશે વિવાદાસ્પદ ટિપ્પણી કરી છે. શુક્રવારે પશ્ચિમ બંગાળના નાદિયા જિલ્લામાં પત્રકારોએ મોઇત્રાને રાજ્યમાં ગેરકાયદેસર ઘૂસણખોરી અંગે પ્રશ્ન પૂછ્યો હતો. આના જવાબમાં તૃણમૂલ કોંગ્રેસના સાંસદે ખૂબ જ વાંધાજનક નિવેદન આપ્યું હતું.
ટીએમસી સાંસદ મહુઆ મોઇત્રાએ પત્રકારોને જણાવ્યું હતું કે, ‘મારી પાસે તેમના (અમિત શાહ) માટે એક સ્પષ્ટ સવાલ છે. તેઓ ફક્ત ઘુસણખોર… ઘુસણખોર…કહી રહ્યા છે. આપણી સરહદનું રક્ષણ કરતી એજન્સી કેન્દ્રીય ગૃહ મંત્રાલય હેઠળ આવે છે.
પ્રધાનમંત્રીએ 15 ઓગસ્ટે લાલ કિલ્લા પરથી કહ્યું હતું કે ઘુસણખોરી થઈ રહી છે અને તેના કારણે વસ્તી વિષયક સ્થિતિ બદલાઈ રહી છે. જ્યારે પ્રધાનમંત્રી આ વાત કહી રહ્યા હતા, ત્યારે પહેલી હરોળમાં બેઠેલા ગૃહમંત્રી તેમની વાત સાંભળીને હસતા હસતા તાળીઓ પાડતા હતા.’
તૃણમૂલ સાંસદે કહ્યું, હતું કે જો ભારતની સરહદોનું રક્ષણ કરવા માટે કોઈ નથી. જો બીજા દેશોના દરરોજ સેંકડો, હજારો અને લાખોની સંખ્યામાં લોકો ઘુસણખોરી કરી રહ્યા છે, આપણી માતાઓ અને બહેનો પર નજર રાખી રહ્યા છે, આપણી જમીનો છીનવી રહ્યા છે, તો પહેલા તમારે અમિત શાહનું માથું કાપીને ટેબલ પર મૂકવું જોઈએ.
ગૃહમંત્રી અને ગૃહ મંત્રાલય ભારતની સરહદોનું રક્ષણ કરી શકતા નથી. પ્રધાનમંત્રી પોતે કહી રહ્યા છે કે બહારથી લોકો આવીને આપણી માતાઓ અને બહેનો પર નજર રાખી રહ્યા છે અને આપણી જમીનો છીનવી રહ્યા છે, તો કોનો વાંક છે? શું અમારી ભૂલ છે કે તમારી? અહીં તો બીએસએફ છે. અમે પણ તેમનાથી ડરીને જીવીએ છીએ.
બાંગ્લાદેશ આપણો મિત્ર દેશ રહ્યો છે, પરંતુ તમારા કારણે છેલ્લા કેટલાક વર્ષોમાં આ પરિસ્થિતિ બદલાઈ ગઈ છે. બંગાળ ભાજપે લખ્યું, ‘મહુઆ મોઇત્રા ગૃહમંત્રીનું માથું કાપી નાખવાની વાત કરે છે, જે ઝખઈની નિરાશા અને હિંસાની સંસ્કૃતિને ઉજાગર કરે છે, જે બંગાળની છબીને કલંકિત કરી રહી છે અને રાજ્યને પાછળ ધકેલી રહી છે.’ બીજેપી પાર્ટીએ તેનો એક વીડિયો પણ શેર કર્યો છે જેમાં મોઇત્રા પત્રકારો સાથે વાત કરતા જોવા મળી રહ્યા છે.
