Tamil Nadu,તા.2
મુખ્યમંત્રી વિજયે મંગળવારે મેટ્ટુરમાં કાવેરી ડેલ્ટા જિલ્લામાં સિંચાઈ માટેના મેટ્ટુર ડેમના દરવાજા ખોલ્યા હતા, ત્યાંથી સલેમ જતા સમયે વિજય ચિન્નાગપુરમાં બુઝુર્ગ મહિલા ચેલમના ઘેર ગયા હતા, જયાં તેમના હાલ-ચાલ પૂછયા હતા એટલું જ નહીં, વિજયે તેમના 40 હજાર રૂપિયાના ડિયોરના સનગ્લાસ ઉતારીને વૃદ્ધા ચેલમને પહેરાવી દીધા હતા.
વૃદ્ધાએ વિજયના સનગ્લાસને પહેરીને તેમનું અભિવાદન કર્યું હતું અને કહ્યું હતું કે વિજયને અચાનક સામે જોઈને આશ્ચર્યચકીત થઈ ગઈ હતી અને કહ્યું હતું કે વિજય તેને ફિલ્મી હીરો જેવા લાગ્યા.
બાદમાં વિજયે વૃદ્ધાને પૂછયું કે તેમણે ભોજન લીધું? જવાબમાં વૃદ્ધાએ કહ્યું કે તે તેની રાહ જોઈ રહી હતી. બાદમાં વિજયે વૃદ્ધા ચેલમને કહ્યું કે તેણે ભોજન લઈ લીધું છે, તમે ભોજન કરી લો.વિજયની આ મુલાકાત સરપ્રાઈઝ હતી. મેટ્ટુર એરપોર્ટ પર જતી વખતે વિજય ખેતર પાસે રોકાયા અને વૃદ્ધ મહિલાઓને મળ્યા.
સીએમ વિજય પલાનીસામીના પશુ શેડમાં ગયા હતા અને લોકો સાથે વાતચીત કરી હતી. વિજયે વૃદ્ધા ચેલમને સાડી અને ખેડૂતોને સિલ્કની ધોતી-સાડીઓ આપી હતી. 15 મીનીટની આ મુલાકાતનો વિડીયો વાયરલ થયો છે. વિજયે મેટ્ટુર ડેમથી સિંચાઈ માટે પાણી છોડયું હતું.
