Jharkhand, તા. 8
રાત્રે કોઈ મહિલાનાં ઘરમાં ઘૂસવું કે તેના કપડાં ઊંચા કરવાનો પ્રયાસ કરવો તે ગુનો હોઈ શકે છે, પરંતુ તેને બળાત્કારનો પ્રયાસ (એટેમ્પ્ટ ટુ રેપ) ગણી શકાય નહીં.
ઝારખંડ હાઈકોર્ટે એક મહત્વપૂર્ણ ચૂકાદામાં મહિલાની લજ્જા ભંગ કરવી અને બળાત્કારના પ્રયાસ વચ્ચેની કાનૂની સીમારેખા સ્પષ્ટ કરતાં આ ચુકાદો આપ્યો છે. જસ્ટિસ પ્રદીપ કુમાર શ્રીવાસ્તવે આરોપીની અપીલ પર સુનાવણી કરતાં જણાવ્યું હતું કે, આરોપીના આ કૃત્યથી બળાત્કારના પ્રયાસનો ગુનો સિદ્ધ થતો નથી.
આ કેસ ડિસેમ્બર 1999નો છે, જેમાં પૂર્વ સિંહભૂમ જિલ્લાની સેશન્સ કોર્ટે આરોપીને બળાત્કારના પ્રયાસ માટે 4 વર્ષની સખત કેદની સજા ફટકારી હતી. આ ચુકાદાને આરોપીએ હાઈકોર્ટમાં પડકાર્યો હતો. હાઈકોર્ટે નીચલી કોર્ટના આદેશમાં સુધારો કરીને આરોપીને બળાત્કારના પ્રયાસના ગુનામાંથી મુક્ત કર્યો હતો અને માત્ર લજ્જા ભંગ કરવાના ગુના હેઠળ દોષિત ઠેરવ્યો હતો.
જસ્ટિસ શ્રીવાસ્તવે ચુકાદો આપતાં કહ્યું હતું કે કોઈ કૃત્ય બળાત્કારનો પ્રયાસ ત્યારે જ ગણાય જ્યારે તે આ ગુનો આચરવાની ખૂબ નજીક હોય. આ કેસમાં રજૂ થયેલાં પુરાવા માત્ર લજ્જા ભંગ કરવા માટે ગુનાહિત બળનો ઉપયોગ બતાવે છે, પરંતુ તે બળાત્કારના પ્રયાસના સ્તર સુધી પહોંચતા નથી.
હાઈકોર્ટે આરોપીની 4 વર્ષની જેલની સજા ઘટાડીને તેને આ કેસમાં અત્યાર સુધી ભોગવેલી લગભગ 8 મહિનાની કસ્ટડીની સજા પૂરતી ગણાવી હતી અને ન્યાયના હિતમાં આરોપીની અપીલને આંશિક રીતે મંજૂર કરી હતી.
