(નયના દવે દ્વારા)
Jamnagar તા.૧૫ઃ
જામનગર તા. ૧૫ જામનગર મહાનગરપાલિકા દ્વારા સ્વચ્છતા ઝુંબેશ અંતર્ગત જાહેરમાં કચરો ફેંકનારા સામે દંડાત્મક કાર્યવાહી વધુ કડક બનાવવામાં આવી રહી છે. ત્યારે જાહેરમાં બાયોમેડિકલ વેસ્ટ ફેંકવા બદલ વધુ એક મહિલા તબીબ પાસેથી રૂ. ૨૦ હજારના દંડાત્મક વહીવટી ચાર્જની વસૂલાત કરવામાં આવી છે. શહેરના પી.એન. માર્ગ નજીક અગાઉ બે તબીબો સામે કાર્યવાહી કરવામાં આવી હતી, તે જ વિસ્તારમાં ફરી બાયોમેડિકલ વેસ્ટ મળી આવતાં મહાનગરપાલિકાની સોલિડ વેસ્ટ શાખાએ આ કાર્યવાહી કરી હતી.
મહાનગરપાલિકાના સોલિડ વેસ્ટ વિભાગ દ્વારા દૈનિક સર્વેલન્સ અને તપાસ હાથ ધરી જાહેરમાં કચરો ફેંકતા લોકોને અટકાવવાની કામગીરી કરવામાં આવી રહી છે. તા. ૧૨ ઓક્ટોબરના રોજ જાહેરમાં બાયોમેડિકલ વેસ્ટ ફેંકવા બદલ બાળ રોગ અને સ્ત્રીરોગ નિષ્ણાત બે તબીબો પાસેથી રૂ. ૧૦-૧૦ હજારનો દંડાત્મક વહીવટી ચાર્જ વસૂલવામાં આવ્યો હતો. ત્યારબાદ આ જ તબીબોની નજીકમાં આવેલી અન્ય એક મહિલા તબીબની કામગીરી દરમિયાન પણ જાહેરમાં બાયોમેડિકલ વેસ્ટ ફેંકવાની બાબત સામે આવી હતી.વોર્ડ નંબર ૯ના સેનેટરી ઇન્સ્પેક્ટર બલવંત ચૌહાણ, સેનેટરી સબ ઇન્સ્પેક્ટર દીપકભાઈ પટેલ અને તેમની ટીમ સર્વેલન્સ રાઉન્ડમાં હતી. દરમિયાન તા. ૧૩ ઓક્ટોબરના રોજ સવારે ૧૧૩૭ વાગ્યે પી.એન. માર્ગ નજીકની એ જ ગલીમાં ફરી મેડિકલ વેસ્ટ જોવા મળ્યો હતો. આથી ગાયનેકોલોજિસ્ટ ડો. ઈલાબેન પુનાતર પાસેથી સોલિડ વેસ્ટ મેનેજમેન્ટના નિયમો હેઠળ રૂ. ૨૦ હજારનો દંડાત્મક વહીવટી ચાર્જ વસૂલવામાં આવ્યો હતો.આમ, એક જ વિસ્તારમાં બે દિવસ દરમિયાન જાહેરમાં બાયોમેડિકલ વેસ્ટ ફેંકવા બદલ ત્રણ તબીબો સામે દંડાત્મક કાર્યવાહી કરવામાં આવી છે. મેડિકલ વેસ્ટનો યોગ્ય નિકાલ કરવાને બદલે જાહેરમાં ફેંકવાની પ્રવૃત્તિ આરોગ્ય અને સ્વચ્છતા માટે ગંભીર પ્રશ્ન ઊભો કરે છે.
શહેરમાં સ્વચ્છતા જાળવવા માટે મહાનગરપાલિકાએ તમામ વોર્ડમાં સર્વેલન્સ વધારી જાહેરમાં કચરો ફેંકનારાઓ સામે કડક પગલાં લેવા જરૂરી બન્યા છે. ખાસ કરીને વોર્ડ નંબર ૧૦માં સુભાષ માર્કેટ નજીક અને વોર્ડ નંબર ૧૩માં માંડવી ટાવર પાછળ સફાઈની કામગીરી છતાં કચરાના ઢગલા થવાની સમસ્યા હોવાની રજૂઆત થઈ રહી છે. સુભાષ માર્કેટ નજીક છેલ્લા ત્રણ વર્ષથી અને માંડવી ટાવર પાછળ લાંબા સમયથી કચરાની સમસ્યા યથાવત્? હોવાના મુદ્દે તંત્ર દ્વારા નિયમિત દેખરેખ અને અસરકારક કાર્યવાહી કરવાની જરૂરિયાત ઊભી થઈ છે.મહાનગરપાલિકાની સ્વચ્છતા ઝુંબેશ માત્ર દંડ વસૂલવા પૂરતી સીમિત ન રહે, પરંતુ જાહેરમાં કચરો અને ખાસ કરીને બાયોમેડિકલ વેસ્ટ ફેંકવાની પ્રવૃત્તિ કાયમી ધોરણે અટકે તે માટે તમામ વોર્ડમાં સતત ચેકિંગ અને નિયમોના કડક અમલની આવશ્યકતા છે.
