Mumbai, તા.૨૬
રિયાલિટી શો ‘રાઇઝ એન્ડ ફોલ ૨’માંથી બહાર આવ્યા બાદ જાણીતી સિંગર અને અભિનેત્રી Sara Gurpal એક ચોંકાવનારો ખુલાસો કર્યો છે. ‘બિગ બોસ ૧૪’ની ભૂતપૂર્વ સ્પર્ધક રહેલી સારાનું કહેવું છે કે શોમાંથી નીકળ્યા બાદ તેને અને તેના પરિવારને સોશિયલ મીડિયા પર સતત જાનથી મારી નાખવાની અને રેપની ધમકીઓ મળી રહી છે. સારાએ પોતાની ઇન્સ્ટાગ્રામ સ્ટોરી દ્વારા આ ગંભીર બાબત જગજાહેર કરી છે.
અભિનેત્રીએ તેના શરીર વિશે ગંદી અને ઘૃણાસ્પદ ટિપ્પણીઓ કરનારા ટ્રોલર્સને આડે હાથ લીધા છે અને તેમની સામે કડક કાયદાકીય કાર્યવાહી કરવાની ચીમકી પણ ઉચ્ચારી છે.સારા ગુરપાલે સોશિયલ મીડિયા પર એક પોસ્ટ શેર કરીને જણાવ્યું હતું કે ‘રાઇઝ એન્ડ ફોલ ૨’માંથી બહાર આવ્યા પછી તેને ભારે ઓનલાઇન સતામણીનો સામનો કરવો પડી રહ્યો છે. તેણે પોતાની ઇન્સ્ટાગ્રામ સ્ટોરીમાં લખ્યું કે, “ઘણો સમય થઈ ગયો મેં આપ સૌ સાથે વાત કરી નહોતી. ‘રાઇઝ એન્ડ ફોલ ૨’ એક ખૂબ જ અલગ અનુભવ હતો, પરંતુ શોમાંથી બહાર આવ્યા બાદ ખાસ કરીને સોશિયલ મીડિયા પર હું જે કંઈ પણ જોઈ રહી છું તે ખૂબ જ વિચિત્ર અને ઘૃણાસ્પદ છે.
”પોતાના પરિવારને નિશાન બનાવવા અને બોડી શેમિંગ અંગે રોષ વ્યક્ત કરતાં સારાએ આગળ લખ્યું કે, “તમે મારા અભિપ્રાય સાથે સહમત કે અસહમત થઈ શકો છો, પરંતુ મને અને મારા પરિવારને જાનથી મારી નાખવાની તથા રેપની ધમકીઓ આપવી અને મારા શરીર વિશે અભદ્ર ટિપ્પણીઓ કરવી એ અત્યંત શરમજનક બાબત છે. દરેક વ્યક્તિનો પોતાનો અલગ અભિપ્રાય હોઈ શકે છે, પરંતુ તેનો અર્થ એ નથી કે તમને કોઈને ધમકાવવાનો કે ગાળો આપવાનો હક મળી જાય છે.”સારાએ પોતાના નિવેદનમાં સ્પષ્ટ કર્યું છે કે અભિપ્રાય રાખવાના અધિકારના નામે કોઈની સાથે ગાળાગાળી કરી શકાય નહીં. તેણે ટ્રોલર્સને ફટકાર લગાવતાં લખ્યું કે, “આવા કાયર ટ્રોલ્સને જવાબદાર ઠેરવવા જોઈએ અને તેમની સામે સખત કાયદાકીય કાર્યવાહી કરવામાં આવશે. તમને શરમ આવવી જોઈએ!” પોતાના આ મેસેજની સાથે સારાએ ‘સાયબર ક્રાઇમ સેલ ઇન્ડિયા’ના સત્તાવાર ઇન્સ્ટાગ્રામ એકાઉન્ટને પણ ટેગ કર્યું છે,
જેથી ઓનલાઇન સતામણીના આ ગંભીર મામલા પર તંત્રનું ધ્યાન દોરી શકાય અને દોષિતો સામે પગલાં લઈ શકાય.સારા ગુરપાલના આ ખુલાસાએ ફરી એકવાર સોશિયલ મીડિયા પર થતા ટ્રોલિંગ અને ઓનલાઇન ધમકીઓના મુદ્દાને ચર્ચામાં લાવી દીધો છે. કોઈપણ રિયાલિટી શોમાં સ્પર્ધકના વર્તન કે અભિપ્રાયને લઈને દર્શકોની પ્રતિક્રિયાઓ અલગ-અલગ હોઈ શકે છે, પરંતુ રેપ અને જાનથી મારી નાખવાની ધમકીઓ આપવી એ અત્યંત ગંભીર ગુનો છે. સારાએ પોતાના નિવેદન દ્વારા સ્પષ્ટ સંદેશ આપ્યો છે કે અસંમતિના નામે કોઈને પણ તેના કે તેના પરિવાર વિરુદ્ધ હિંસક ધમકીઓ આપવાનો અધિકાર નથી. હવે જોવાનું એ રહેશે કે સાયબર ક્રાઇમ દ્વારા આ મામલે આગળ શું કાર્યવાહી કરવામાં આવે છે.
