Washington,તા.૫
યુનાઇટેડ સ્ટેટ્સના લુઇસવિલે મુહમ્મદ અલી આંતરરાષ્ટ્રીય એરપોર્ટ પરથી ટેકઓફ કર્યા પછી તરત જ એક યુપીએસ કાર્ગો વિમાન ક્રેશ થયું યુપીએસ એક પાર્સલ કંપની છે. વિમાન હવાઈ જઈ રહ્યું હતું. ફેડરલ એવિએશન એડમિનિસ્ટ્રેશન અનુસાર, આ યુપીએસ એમડી-૧૧ વિમાન ટેકઓફ કર્યા પછી તરત જ ક્રેશ થયું.એફએએએ જણાવ્યું કે નેશનલ ટ્રાન્સપોર્ટેશન સેફ્ટી બોર્ડ આ અકસ્માતની તપાસ કરી રહ્યું છે.
વિમાન જમીન પર પડતાની સાથે જ ભીષણ આગ ફાટી નીકળી હતી. અકસ્માત બાદ, અધિકારીઓએ એરસ્પેસ બંધ કરી દીધી હતી અને રહેવાસીઓને સ્થળાંતર કરવાનો આદેશ આપ્યો હતો.યુપીએસ દ્વારા જારી કરાયેલા એક નિવેદનમાં જણાવાયું હતું કે વિમાનમાં ત્રણ ક્રૂ સભ્યો સવાર હતા. લુઇસવિલે મેટ્રો પોલીસ અને અન્ય ઘણી એજન્સીઓ ઘટનાસ્થળે પહોંચી ગઈ હતી. સોશિયલ મીડિયા પરના વીડિયોમાં એરપોર્ટ નજીક કાળા ધુમાડાના મોટા ગોટેગોટા ઉડતા જોવા મળ્યા હતા.
કેન્ટુકીના ગવર્નર એન્ડી બેશિયરે જણાવ્યું હતું કે વિમાન દુર્ઘટનામાં ઓછામાં ઓછા ત્રણ લોકો માર્યા ગયા હતા અને ૧૧ ઘાયલ થયા હતા. “અમે કેન્ટુકીના તમામ રહેવાસીઓને અસરગ્રસ્તો માટે પ્રાર્થના કરવા વિનંતી કરીએ છીએ,” બેશિયરે કહ્યું. “દુર્ઘટના બાદ પોલીસ અને ફાયર એજન્સીઓનો પ્રતિભાવ પ્રશંસનીય છે. વિવિધ જ્વલનશીલ અને સંભવિત વિસ્ફોટક પદાર્થોને કારણે તે ખતરનાક પરિસ્થિતિ છે.”
લુઇસવિલે મુહમ્મદ અલી ઇન્ટરનેશનલ એરપોર્ટ યુપીએસ માટે વિશ્વનું સૌથી મોટું હબ છે. કંપનીનું વર્લ્ડપોર્ટ અહીં સ્થિત છે, જે ૫ મિલિયન ચોરસ ફૂટમાં ફેલાયેલું છે. આ વિશાળ સુવિધામાં દરરોજ ૧૨,૦૦૦ થી વધુ કર્મચારીઓ આશરે ૨ મિલિયન પાર્સલની પ્રક્રિયા કરે છે. આ જ કારણ છે કે આ અકસ્માત યુપીએસ માટે મોટી ચિંતાનો વિષય બની ગયો છે.
