Mumbai,તા.૨૨
ટી ૨૦ વર્લ્ડ કપ ૨૦૨૬ માટેની તૈયારીઓ શરૂ થઈ ગઈ છે. આ ટુર્નામેન્ટ આવતા વર્ષે ભારત અને શ્રીલંકા સંયુક્ત રીતે યોજાવાની છે. મીડિયા અહેવાલો અનુસાર, ટુર્નામેન્ટ ૭ ફેબ્રુઆરીથી શરૂ થઈ શકે છે, અને ફાઇનલ મેચ ૮ માર્ચે રમાય તેવી શક્યતા છે. મોટા સમાચાર એ છે કે આ પ્રતિષ્ઠિત ટુર્નામેન્ટમાં ૧૫ ફેબ્રુઆરીએ કોલંબોના આર. પ્રેમદાસા સ્ટેડિયમમાં ભારત અને પાકિસ્તાનની ટીમો ટકરાશે તેવી અપેક્ષા છે.
ભારત ડિફેન્ડિંગ ચેમ્પિયન તરીકે ઘરઆંગણે વર્લ્ડ કપમાં પ્રવેશ કરશે. ટીમે ગયા વર્ષે જૂનમાં બાર્બાડોસમાં છેલ્લો ટી ૨૦ વર્લ્ડ કપ જીત્યો હતો. જો પાકિસ્તાન ફાઇનલમાં પહોંચે છે, તો ટાઇટલ મેચ શ્રીલંકામાં રમાશે.આઇસીસી,બીસીસીઆઇ અને પીસીબી વચ્ચેના કરાર મુજબ, ભારત અને પાકિસ્તાન વચ્ચેની બધી મેચ ૨૦૨૭ સુધી તટસ્થ સ્થળોએ રમાશે.આઇસીસી હજુ પણ સમયપત્રકને અંતિમ સ્વરૂપ આપી રહ્યું છે, પરંતુ અહેવાલો અનુસાર, ટુર્નામેન્ટ વિન્ડોને અંતિમ સ્વરૂપ આપવામાં આવ્યું છે અને ભાગ લેનારા દેશો સાથે શેર કરવામાં આવ્યું છે.
ભારત અને શ્રીલંકા દ્વારા આયોજિત થનારા ટી ૨૦ વર્લ્ડ કપ ૨૦૨૬ માટેના સ્થળોને શોર્ટલિસ્ટ કરવામાં આવ્યા છે. આમાં ભારતના પાંચ અને શ્રીલંકાના ત્રણ સ્થળોનો સમાવેશ થાય છે.બીસીસીઆઇએ ટી ૨૦ વર્લ્ડ કપ ૨૦૨૬ માટેના સ્થળોની યાદીમાં અમદાવાદ, દિલ્હી, કોલકાતા, ચેન્નાઈ અને મુંબઈનો સમાવેશ કર્યો છે.
