Perth,તા.૨૨
ઓસ્ટ્રેલિયા અને ઇંગ્લેન્ડ વચ્ચે એશિઝ ટેસ્ટ શ્રેણીની પહેલી મેચ પર્થના ઓપ્ટસ સ્ટેડિયમ ખાતે રમાઈ રહી છે. આ ટેસ્ટ મેચ ઈંગ્લેન્ડના ઓપનર જેક ક્રોલીએ માટે ભૂલી જવા જેવી રહી છે. તે બંને ઇનિંગ્સમાં ખાતું ખોલ્યા વિના પેવેલિયન પરત ફર્યો હતો. ક્રોલીની નબળી બેટિંગે હવે તેનું નામ શરમજનક યાદીમાં ઉમેર્યું છે. હકીકતમાં, એશિઝના ઇતિહાસમાં ૬૬ વર્ષમાં આ પહેલી વાર બન્યું છે કે ઓસ્ટ્રેલિયામાં એશિઝ ટેસ્ટની બંને ઇનિંગ્સમાં ઓપનિંગ બેટ્સમેન એક પણ રન વગર આઉટ થયા હોય.
ઓસ્ટ્રેલિયામાં ચાર એવા કિસ્સા બન્યા છે જ્યાં એશિઝ ટેસ્ટની બંને ઇનિંગ્સમાં ઓપનિંગ બેટ્સમેન એક પણ રનની ભાગીદારી વિના આઉટ થયા હોય. પહેલી વાર ૧૯૩૩માં બન્યું હતું. તે વર્ષે, ઓસ્ટ્રેલિયાની વિક રિચાર્ડસન અને બિલ વુડફુલની ઓપનિંગ જોડી એક પણ રનની ભાગીદારી વિના પેવેલિયન પરત ફર્યા હતા. વિક રિચાર્ડસન તે મેચની બંને ઇનિંગ્સમાં સ્કોર કરવામાં નિષ્ફળ રહ્યા હતા. ત્યારબાદ, ૧૯૫૦માં, ઓસ્ટ્રેલિયાના જેક મુરોની અને આર્થર મોરિસ પણ એક પણ રનની ભાગીદારી વિના પેવેલિયન પરત ફર્યા હતા. જેક મુરોની બંને ઇનિંગ્સમાં શૂન્ય પર આઉટ થયા હતા.
૧૯૫૯માં, ઇંગ્લેન્ડની ટ્રેવર બેઈલી અને પીટર રિચાર્ડસનની ઓપનિંગ જોડી પણ રનની ભાગીદારી વિના આઉટ થઈ હતી. તે મેચમાં, ટ્રેવર બેઈલી પ્રથમ ઇનિંગ્સમાં ગોલ્ડન ડક પર આઉટ થયા હતા. બીજી ઇનિંગમાં પાંચ બોલનો સામનો કર્યા પછી પણ તે રન બનાવવામાં નિષ્ફળ ગયો. જેક ક્રોલી હવે આ રેકોર્ડ ધરાવે છે. ક્રોલી પર્થમાં રમાઈ રહેલી ટેસ્ટ મેચની બંને ઇનિંગમાં કોઈ રન બનાવ્યા વિના પેવેલિયન પરત ફર્યા. મિશેલ સ્ટાર્કે બંને ઇનિંગમાં તેને આઉટ કર્યો. આ સાથે, જેક ક્રોલીએ પોતાના નામે વધુ એક રેકોર્ડ ઉમેર્યો છેઃ તે ઉ્ઝ્ર ઇતિહાસમાં ૧૦ વખત શૂન્ય પર આઉટ થનાર પ્રથમ ઓપનિંગ બેટ્સમેન બન્યો છે.
પર્થ ટેસ્ટ મેચની વાત કરીએ તો, ઇંગ્લેન્ડે ટોસ જીતીને પહેલા બેટિંગ કરવાનો નિર્ણય લીધો. પહેલા બેટિંગ કરતા, ઇંગ્લેન્ડ પ્રથમ ઇનિંગમાં ૧૭૨ રનમાં ઓલઆઉટ થઈ ગયું. મિશેલ સ્ટાર્કે પ્રથમ ઇનિંગમાં ઓસ્ટ્રેલિયા માટે સૌથી વધુ વિકેટ લેનાર બોલર બન્યો. જવાબમાં, ઓસ્ટ્રેલિયા પ્રથમ ઇનિંગમાં ૧૩૨ રનમાં ઓલઆઉટ થઈ ગયું, જેના કારણે ઇંગ્લેન્ડને ૪૦ રનની લીડ મળી.
