Washington,તા.21
હવે શાળાઓમાં માત્ર માનવ શિક્ષકો જ નહીં, પરંતુ માણસો જેવો જ ચહેરો અને દેખાવ ધરાવતો રોબોટ પણ ભણાવતો જોવા મળી શકે છે. અમેરિકામાં પહેલી વાર કોઈ શાળામાં માનવ જેવો દેખાતો રોબોટ 11મા અને 12મા ધોરણનાં વિદ્યાર્થીઓને ભણાવવામાં શિક્ષકોની મદદ કરશે.
આનું નામ ‘સેલી’ રાખવામાં આવ્યું છે. સેલી ચાલી શકતી નથી. આની કિંમત 50 લાખ રૂપિયા છે. આ રકમ ન્યૂયોર્કમાં એક સરેરાશ શિક્ષકના વાર્ષિક પગાર કરતાં પણ ઓછી બતાવવામાં આવી છે.
લેપટોપ જેટલી વીજળીથી ચાલશે
રોબોટ સેલીનો વીજ વપરાશ પણ એક લેપટોપ જેટલો જ છે. આનો ડિજિટલ અવતાર પણ છે. વિદ્યાર્થીઓ પોતાનાં લેપટોપ પર આ અવતાર સાથે પણ વાતચીત કરી શકશે.
રોબોટ શીખવશે નવી એઆઈ તકનીક
શરૂઆતમાં સેલીનો ઉપયોગ માત્ર શાળાનાં વિશેષ એઆઈ અને રોબોટિક્સ કોર્સમાં જ કરવામાં આવશે. જો આ પ્રયોગ સફળ રહ્યો તો પછીથી અન્ય વિષયોમાં પણ આનો ઉપયોગ થઈ શકે છે.
આ રોબોટ આગળ જઈને વિજ્ઞાન, ટેકનોલોજી, એન્જિનિયરિંગ, કળા અને ગણિત વિષયો પણ ભણાવી શકશે. રોબોટિક શિક્ષકોનો ઉપયોગ જાપાન, ચીન, સાઉથ કોરિયામાં પણ કરવામાં આવી ચૂક્યો છે. જોકે, અત્યારે આ પ્રયોગનાં સ્તર સુધી જ મર્યાદિત છે.
