બે કલાકના રેસ્ક્યૂ બાદ હેમખેમ બહાર કઢાયો
(મિલાપ રૂપારેલ દ્વારા)
Amreli
Amreli જિલ્લાના ગીરકાંઠાના ધારી પંથકમાં વન્યજીવોની અવરજવર વચ્ચે ગીગાસણ ગામે ફરી એક વખત મહાકાય અજગર દેખા દેતાં ગ્રામજનોમાં કુતૂહલ સાથે ચિંતા ફેલાઈ હતી. ગામમાં એક કૂવામાં અંદાજે ૧૫ ફૂટ લાંબો મહાકાય અજગર ખાબકતાં ખેડૂતે તાત્કાલિક સેવાભાવી લોકોને જાણ કરી હતી. ત્યારબાદ ક્રેઇનની મદદથી હાથ ધરાયેલા રેસ્ક્યૂ ઓપરેશનમાં આશરે બે કલાકની ભારે જહેમત બાદ અજગરને સુરક્ષિત રીતે કૂવામાંથી બહાર કાઢવામાં આવ્યો હતો.
પ્રાપ્ત વિગતો અનુસાર, ધારી તાલુકાના ગીગાસણ ગામે એક ખેડૂતની નજર કૂવામાં પડેલા મહાકાય અજગર પર પડી હતી. કૂવામાં અજગર ખાબક્યો હોવાનું જણાતાં તેને બહાર કાઢવા માટે સેવાભાવી લોકોને જાણ કરવામાં આવી હતી. ઘટનાની ગંભીરતાને ધ્યાનમાં રાખીને અજગરને સુરક્ષિત રીતે બહાર કાઢવા માટે રેસ્ક્યૂ ઓપરેશન હાથ ધરવામાં આવ્યું હતું.
કૂવાની ઊંડાઈ અને અજગરના વિશાળ કદને ધ્યાનમાં રાખીને ક્રેઇનની મદદ લેવામાં આવી હતી. અને સેવાભાવી રમેશ કાતરીયા ક્રેઇનની મદદથી કૂવામાં ઊતર્યા હતા અને સાવચેતીપૂર્વક અજગરને બહાર કાઢવાની કામગીરી શરૂ કરી હતી. લગભગ બે કલાક સુધી ચાલેલી જહેમત બાદ ૧૫ ફૂટના મહાકાય અજગરને હેમખેમ બહાર કાઢવામાં સફળતા મળી હતી.
અજગરને સુરક્ષિત રીતે બહાર કાઢવામાં આવતાં ગ્રામજનોએ રાહતનો શ્વાસ લીધો હતો. ત્યારબાદ અજગરને તેના કુદરતી રહેઠાણમાં મુક્ત કરી કુદરતના ખોળે રમતો મૂકવામાં આવ્યો હતો. આ સમગ્ર રેસ્ક્યૂ ઓપરેશનમાં સેવાભાવી રમેશ કાતરીયાની કામગીરી નોંધપાત્ર રહી હતી.
ધારી પંથકમાં અજગરની અવરજવરથી કુતૂહલ
ધારી અને આસપાસના ગીરકાંઠાના વિસ્તારોમાં અગાઉ પણ અનેક વખત અજગર જોવા મળ્યાની ઘટનાઓ સામે આવી છે. ગીર વિસ્તારની કુદરતી જૈવવિવિધતાને કારણે આ વિસ્તારમાં વિવિધ વન્યજીવોની અવરજવર જોવા મળે છે. જોકે, અજગર જેવા વન્યજીવો માનવ વસાહત નજીક કે કૂવામાં દેખાય ત્યારે સાવચેતી રાખવી અત્યંત જરૂરી બને છે. આવા સમયે વન્યજીવને નુકસાન પહોંચાડવાને બદલે તાલીમબદ્ધ રેસ્ક્યૂ ટીમ અથવા વનવિભાગની મદદથી તેને સુરક્ષિત રીતે કુદરતી રહેઠાણમાં પહોંચાડવો એ જ યોગ્ય અભિગમ છે.
