Ahmedabad,તા.૧૭
ગુજરાતમાં ચોમાસાની શરૂઆત ધોધમાર વરસાદ સાથે થઈ છે. છેલ્લા ત્રણ દિવસથી રાજ્યના મોટાભાગના વિસ્તારોમાં મેઘરાજાની ધમાકેદાર એન્ટ્રી થઈ ચૂકી છે. ત્યારે ભાવનગર, અમરેલી અને સુરેન્દ્રનગર સહિતના સૌરાષ્ટ્ર વિસ્તારમાં ધોધમાર વરસાદ ખાબક્યો છે. આ સિવાય દક્ષિણ ગુજરાતમાં પણ અનરાધાર વરસાદની સ્થિતિ સર્જાઈ છે. નદીઓમાં પુર આવતા અનેક ગામડાઓમાં પાણી ઘુસી ગયા છે. જ્યારે અનેક પુલ તૂટી જતા વાહનવ્યવહાર પણ ખોરવાયો છે. આ સિવાય અનેક લોકોના ઘરની સામગ્રી નાશ પામી છે. અનેક ગામના લોકો પ્રભાવિત થયા છે. કેટલાક વિસ્તારમાં તો જનજીવન પણ પ્રભાવિત થયું છે. ત્યારે રાજ્યમાં હજુ ભારે વરસાદની આગાહી વચ્ચે ગાંધીનગરમાં બે મહત્ત્વની બેઠક યોજાઈ હતી.
આજે (૧૭ જૂન) મુખ્યમંત્રી ભૂપેન્દ્ર પટેલની અધ્યક્ષતામાં સ્ટેટ ઇમરજન્સી ઓપરેશન સેન્ટર ખાતે બેઠક યોજાઈ હતી. જેમાં ગુજરાતમાં વરસાદની સ્થિતિ અને બચાવ કાર્યો મુદ્દે સમીક્ષા કરાઈ હતી. બેઠકમાં રાજ્યના મુખ્ય સચિવ પંકજ જોષી, અધિક સચિવ જંયતિ રવિ અને રાહત કમિશનર સહિતના અધિકારીઓ હાજર રહ્યા હતા. તેમણે તમામ જિલ્લા કલેકટર સાથે વીડિયો કોન્ફરન્સથી વાત કરી હતી.આ અગાઉ ગાંધીનગરમાં સ્ટેટ ડિઝાસ્ટર ઓપરેશન સેન્ટર ખાતે રાહત કમિશનર આલોક પાંડેની ઉપસ્થિતિમાં વેધર વોચ કમિટીની બેઠક પણ યોજાઈ હતી. બેઠકમાં હવામાન વિભાગ, માર્ગ-મકાન, દ્ગડ્ઢઇહ્લ, જીડ્ઢઇહ્લ અને કોસ્ટ ગાર્ડ સહિતની એજન્સીના અધિકારીઓ હાજર રહ્યા હતા. જે દરમિયાન રાજ્યમાં વરસાદની સ્થિતિ, રાહત-બચાવ કાર્ય સહિતની બાબતો પર સમીક્ષા કરાઈ હતી.
