Mumbai,તા.21
દેશની રાજધાની દિલ્હીમાં નાગરિક અધિકારો માટે લડતા સંગઠન ‘કોકરોચ જનતા પાર્ટી’ (CJP) દ્વારા આયોજિત ‘સંસદ માર્ચ’ સોશિયલ મીડિયા અને મીડિયા જગતમાં ભારે ચર્ચાનો વિષય બન્યો છે. આ શાંતિપૂર્ણ વિરોધ પ્રદર્શનમાં સામાન્ય નાગરિકોની સાથે બોલિવૂડ અને સિનેમા જગતની જાણીતી હસ્તીઓએ પણ ભાગ લીધો હતો. પીઢ અભિનેત્રી શબાના આઝમી અને સાઉથ તથા બોલિવૂડના દિગ્ગજ અભિનેતા પ્રકાશ રાજ સામાન્ય દેખાવકારોની જેમ ટ્રકોમાં સવાર થઈને આ માર્ચમાં સામેલ થયા હતા, જેના ફોટા અને વીડિયો વાયરલ થઈ રહ્યા છે.આ વિરોધ પ્રદર્શનની સૌથી મોટી હાઇલાઇટ એ રહી કે કોઈ પણ વીઆઇપી કલ્ચર વિના, શબાના આઝમી અને પ્રકાશ રાજ અન્ય પ્રદર્શનકારીઓ સાથે ખભેખભા મિલાવીને ઊભા રહ્યા હતા. દિલ્હીમાં સુરક્ષાના ચુસ્ત બંદોબસ્ત અને કડક પાબંદીઓ વચ્ચે આ કલાકારો સામાન્ય ટ્રકોમાં સવાર થઈને સંસદ તરફ કૂચ કરી રહેલા માર્ચમાં જોડાયા હતા. લોકશાહી અને નાગરિકોના હકોના સમર્થનમાં પ્લેકાર્ડ્સ અને બેનરો સાથે આ કલાકારોએ ખૂબ જ શાંતિપૂર્ણ રીતે પોતાનો અવાજ બુલંદ કર્યો હતો.આ CJP પ્રોટેસ્ટને ધ્યાનમાં રાખીને દિલ્હી પોલીસ અને પ્રશાસન દ્વારા સુરક્ષાની અભૂતપૂર્વ વ્યવસ્થા કરવામાં આવી હતી. દિલ્હીના 5 મહત્ત્વના મેટ્રો સ્ટેશનો તકેદારીના ભાગરૂપે બંધ કરી દેવામાં આવ્યા હતા અને સુરક્ષા વ્યવસ્થા જાળવી રાખવા માટે 5,000થી વધુ જવાનો તૈનાત કરવામાં આવ્યા હતા. આટલી કડક સુરક્ષા અને પ્રતિબંધો હોવા છતાં, પ્રદર્શનકારીઓ અને સેલિબ્રિટીઝે કાયદો અને વ્યવસ્થા જાળવી રાખીને સંપૂર્ણપણે શાંતિપૂર્ણ રીતે આ રેલીનું આયોજન કર્યું હતું, જેને કારણે દેશભરના મીડિયાનું ધ્યાન આ માર્ચ તરફ ખેંચાયું છે.
