New Delhi તા.5
સુરત સ્થિત એક પ્રખ્યાત ઉદ્યોગપતિ અને રાજ્યસભા સાંસદ ગોવિંદ ધોળકિયાએ ICC મહિલા ODI વર્લ્ડ કપ 2025 જીતનારી ભારતીય મહિલા ક્રિકેટ ટીમ માટે એક ભવ્ય ભેટની જાહેરાત કરી છે.
ગોવિંદ ધોળકિયાએ જાહેરાત કરી છે કે, તેઓ ટીમના દરેક સભ્યને તેમના ઘર માટે હાથથી બનાવેલા અસલી હીરાના દાગીના અને છત પરના સોલાર પેનલ ભેટમાં આપશે. ગોવિંદ ધોળકિયાએ BCCI ના ઉપાધ્યક્ષ રાજીવ શુક્લાને લખેલા પત્રમાં પોતાની ઇચ્છા વ્યક્ત કરી છે.
ધોળકિયાએ તેમના પત્રમાં લખ્યું છે કે, “તેમની અસાધારણ યાત્રાની ઉજવણી કરવા માટે, અમે ચેમ્પિયન ભારતીય ટીમના દરેક સભ્યને તેમના ઉત્કૃષ્ટ પ્રદર્શન અને ક્યારેય હાર ન માનવાની ભાવના માટે પ્રશંસાના પ્રતીક તરીકે, હાથથી બનાવેલા, અસલી હીરાના ઘરેણાંનો ટુકડો ભેટમાં આપવાનું સન્માન અનુભવીશું.” આ ભેટ ભારતીય મહિલા ખેલાડીઓની મહેનત અને સફળતાની તેજસ્વીતાનું પ્રતીક હશે.
સામાજિક કાર્ય માટે જાણીતા ધોળકિયાએ ઘરેણાં ઉપરાંત એક અનોખી અને કાયમી ભેટની જાહેરાત કરી છે. તેમણે ટીમના તમામ સભ્યોને રૂફટોપ સોલાર પેનલ ભેટમાં આપવાની ઇચ્છા વ્યક્ત કરી.
તેમણે કહ્યું, “આ ઉપરાંત, અમે તેમના ઘરોને રૂફટોપ સોલાર પેનલ પણ ભેટમાં આપવા માંગીએ છીએ, જેથી તેમણે જે પ્રકાશથી આપણા દેશને પ્રકાશિત કર્યો છે તે તેમના પોતાના જીવનમાં ચમકતો રહે.”
તેઓએ વધુમાં કહ્યું કે, “મહિલા ક્રિકેટરોએ તેમની હિંમત, શિસ્ત અને દૃઢ નિશ્ચયથી અબજો ભારતીયોના દિલ જીતી લીધા છે. તેમણે ભારપૂર્વક જણાવ્યું કે આ હૃદયસ્પર્શી ભેટ તેમના વિશ્વાસને પ્રતિબિંબિત કરે છે કે સાચી સફળતા લોકો અને ધરતી બંનેને લાભ આપ્યો છે.”
હરમનપ્રીત કૌરની આગેવાની હેઠળની ભારતીય ટીમે રવિવારે દક્ષિણ આફ્રિકાને 52 રનથી હરાવીને આ ઐતિહાસિક જીત હાંસલ કરી. આ ભેટ મેદાન પર સફળતાને સમાજમાં ઉર્જા અને પ્રેરણા સાથે જોડવાનું એક ઉત્તમ ઉદાહરણ છે.
