Raipur,તા.૧૫
છત્તીસગઢ દારૂ કૌભાંડમાં ઈડીએ મોટી કાર્યવાહી કરી છે. છત્તીસગઢમાં કોંગ્રેસ સરકાર દરમિયાન થયેલા ૨,૧૦૦ કરોડ રૂપિયાથી વધુના કથિત દારૂ કૌભાંડ સાથે સંબંધિત કેસમાં એન્ફોર્સમેન્ટ ડિરેક્ટોરેટ એ જપ્તી કરી છે. ઈડી ટીમે મની લોન્ડરિંગ કેસની તપાસના સંદર્ભમાં તેના ધારાસભ્ય કવાસી લખમાની ૬.૧૫ કરોડ રૂપિયાની સંપત્તિ ઉપરાંત રાજ્યમાં કોંગ્રેસ પાર્ટીનું એક કાર્યાલય પણ જપ્ત કર્યું છે.
સૂત્રોએ જણાવ્યું હતું કે આ મિલકતો જપ્ત કરવાનો કામચલાઉ આદેશ પ્રિવેન્શન ઓફ મની લોન્ડરિંગ એક્ટ હેઠળ જારી કરવામાં આવ્યો છે. તેમણે કહ્યું કે જપ્ત કરાયેલી મિલકતોમાં કવાસી લખમા, તેમના પુત્ર હરીશ લખમા અને સુકમા જિલ્લામાં કોંગ્રેસ કાર્યાલયની ઇમારતની મિલકતોનો સમાવેશ થાય છે. એજન્સીએ ડિસેમ્બર ૨૦૨૪ માં રાયપુર, સુકમા અને ધમતારી જિલ્લામાં લખમા સાથે જોડાયેલા પરિસરમાં દરોડા પાડ્યા હતા. ઈડી દ્વારા કવાસી લખમાની પણ ધરપકડ કરવામાં આવી હતી.
લખમા કોન્ટા વિધાનસભા બેઠક પરથી છ વખત ધારાસભ્ય રહી ચૂક્યા છે અને ભૂતપૂર્વ મુખ્યમંત્રી ભૂપેશ બઘેલની આગેવાની હેઠળની કોંગ્રેસ સરકારમાં આબકારી મંત્રી રહી ચૂક્યા છે. હરીશ લખમા સુકમામાં પંચાયત પ્રમુખ છે. એન્ફોર્સમેન્ટ ડિરેક્ટોરેટનો આરોપ છે કે છત્તીસગઢ દારૂ કૌભાંડમાં રાજ્યના ખજાનાને “મોટું નુકસાન” થયું હતું અને દારૂ સિન્ડિકેટના લાભાર્થીઓએ આ ગુનામાંથી ૨,૧૦૦ કરોડ રૂપિયાથી વધુની ગેરકાયદેસર આવક મેળવી હતી. એવો આરોપ છે કે ગેરકાયદેસર દારૂના વેપારમાંથી મળેલી આવકનો ઉપયોગ સુકમામાં કોંગ્રેસ કાર્યાલય બનાવવા માટે કરવામાં આવ્યો હતો.ઇડીનો દાવો છે કે છત્તીસગઢ દારૂ કૌભાંડ લગભગ ૨૧૦૦ કરોડ રૂપિયાનું છે.
ઈડીનો આરોપ છે કે કાવાસી લખમાએ દારૂ કૌભાંડમાં દર મહિને ૨ કરોડ રૂપિયાનું કમિશન લીધું છે. એવો દાવો કરવામાં આવી રહ્યો છે કે આ પૈસાથી તેમણે સુકમામાં કોંગ્રેસ કાર્યાલય બનાવ્યું હતું. આ સાથે તેમણે પોતાના પુત્ર માટે ઘર પણ બનાવ્યું હતું. છત્તીસગઢ દારૂ કૌભાંડ કોંગ્રેસના કાર્યકાળ દરમિયાન થયું હતું. આ કૌભાંડ કોંગ્રેસ સરકાર દરમિયાન પ્રકાશમાં આવ્યું છે. આ કૌભાંડ દરમિયાન, કાવાસી લખમા છત્તીસગઢ સરકારમાં આબકારી વિભાગના મંત્રી હતા.
