Washington,તા.૧૧
મધ્ય પૂર્વમાં યુદ્ધ શરૂ થયાને ૧૨ દિવસ થઈ ગયા છે, પરંતુ Iran પર America અને Israelના હુમલાઓ સતત ચાલુ છે. ઇઝરાયલી સૈન્યએ ઈરાનની રાજધાની તેહરાનને નિશાન બનાવીને મોટો હુમલો કર્યો છે. આ દરમિયાન, અમેરિકન સૈન્યએ સમુદ્રમાં ઘણી ઈરાની બોટ અને સબમરીનનો નાશ કર્યો છે. અમેરિકાએ જાહેર કર્યું છે કે જ્યાં સુધી ઈરાનની સેના નાશ પામે અને આત્મસમર્પણ ન કરે ત્યાં સુધી યુદ્ધ ચાલુ રહેશે. આ દરમિયાન, ઈરાનના હુમલામાં માર્યા ગયેલા અને ઘાયલ થયેલા અમેરિકન સૈનિકોની સંખ્યા અંગે માહિતી બહાર આવી છે.
સેન્ટકોમે અહેવાલ આપ્યો છે કે ઈરાન સાથેના યુદ્ધમાં અત્યાર સુધીમાં આઠ સૈનિકો મૃત્યુ પામ્યા છે. યુએસ ડિફેન્સ ડિપાર્ટમેન્ટ પેન્ટાગોને અહેવાલ આપ્યો છે કે ઈરાન સાથે ચાલી રહેલા યુદ્ધમાં આશરે ૧૪૦ અમેરિકન સૈનિકો ઘાયલ થયા છે. એક પ્રવક્તાએ જણાવ્યું હતું કે આમાંથી મોટાભાગના સૈનિકોને નાની ઈજાઓ થઈ છે. ૧૦૮ ઘાયલ સૈનિકો ફરજ પર પાછા ફર્યા છે. જોકે, આઠ સૈનિકો ગંભીર રીતે ઘાયલ થયા હોવાના અહેવાલ છે. કુવૈત અને સાઉદી અરેબિયામાં પણ સાત સૈનિકોએ પોતાના જીવ ગુમાવ્યા છે.
ઈરાને ઈઝરાયલ પર બદલો લેવાના હુમલાનો વીડિયો પણ બહાર પાડ્યો છે. વીડિયોમાં મિસાઈલ છોડાતી જોવા મળે છે. આ વીડિયોમાં, એક પછી એક અનેક મિસાઈલો છોડાતી જોઈ શકાય છે. કેટલીક મિસાઈલો છોડ્યા પછી વિસ્ફોટો પણ સંભળાય છે. ઈરાને આ મિસાઈલોને ક્યાં નિશાન બનાવી છે તે હજુ સુધી સ્પષ્ટ નથી.
ઇઝરાયલે લેબનોનની રાજધાની બેરૂતમાં હિઝબુલ્લાહના ઠેકાણાઓ પર હુમલો કર્યો છે. ઇઝરાયલે દાવો કર્યો છે કે તેણે હિઝબુલ્લાહના નાણાકીય પાંખ, અલ-કાર્દ-અલ-હસનને નિશાન બનાવ્યું છે. આ ઠેકાણું બેરૂતની દક્ષિણમાં આવેલું છે. ઇઝરાયલે કહ્યું કે હવાઈ હુમલાની સાથે, ભૂમિ સેના પણ હિઝબુલ્લાહના ઠેકાણાઓ પર હુમલો કરી રહી છે… હિઝબુલ્લાહે એવો પણ દાવો કર્યો છે કે તેણે ઉત્તરી ઇઝરાયલમાં સૈનિકોને નિશાન બનાવીને રોકેટ છોડ્યા છે.
