Maharashtra,તા.૨૦
Maharashtraમાં ફડણવીસ સરકારના મંત્રીમંડળનું વિસ્તરણ કરવામાં આવ્યું છે. રાષ્ટ્રવાદી કોંગ્રેસ પાર્ટીના નેતા છગન ભુજબળે મંત્રી પદના શપથ લીધા છે. ભુજબળે રાજભવન ખાતે મહારાષ્ટ્ર સરકારમાં મંત્રી તરીકે શપથ લીધા. આ દરમિયાન મહારાષ્ટ્રના સીએમ દેવેન્દ્ર ફડણવીસ, ડેપ્યુટી સીએમ એકનાથ શિંદે અને અજિત પવાર પણ હાજર હતા.
છગન ભુજબળ મહારાષ્ટ્રના એક જાણીતા રાજકારણી છે. તેમનો જન્મ ૧૫ ઓક્ટોબર ૧૯૪૭ના રોજ થયો હતો. તેઓ નાસિક જિલ્લાના યેવલા વિધાનસભા મતવિસ્તારના ધારાસભ્ય છે. તેમણે શરૂઆતના જીવનમાં મુંબઈના ભાયખલા માર્કેટમાં શાકભાજી વેચવાનું કામ કર્યું. તેમણે એન્જિનિયરિંગમાં ડિપ્લોમા મેળવ્યો છે.
ભુજબળે ૧૯૬૦ના દાયકામાં શિવસેના સાથે રાજકીય કારકિર્દી શરૂ કરી હતી અને લગભગ ૨૫ વર્ષ સુધી પાર્ટી સાથે રહ્યા હતા. તેઓ ૧૯૮૫માં માઝગાંવથી શિવસેનાના ધારાસભ્ય તરીકે ચૂંટાયા હતા અને બે વાર આ બેઠક જીતી હતી. ૧૯૯૧માં, મંડળ આંદોલન દરમિયાન ઓબીસી અનામતના મુદ્દા પર શિવસેના સાથેના મતભેદોને કારણે, તેઓ પાર્ટી છોડીને ભારતીય રાષ્ટ્રીય કોંગ્રેસમાં જોડાયા. બાદમાં, જ્યારે શરદ પવારે ૧૯૯૯માં એનસીપીની રચના કરી, ત્યારે ભુજબળ તેમની સાથે ગયા. તે જ વર્ષે, તેઓ કોંગ્રેસ-એનસીપી ગઠબંધન સરકારમાં મહારાષ્ટ્રના નાયબ મુખ્યમંત્રી અને ગૃહમંત્રી બન્યા.
ભુજબળે ગૃહ, જાહેર બાંધકામ (પીડબ્લ્યુડી), ખાદ્ય અને નાગરિક પુરવઠા અને ગ્રાહક બાબતો જેવા વિવિધ મંત્રાલયોમાં મંત્રી તરીકે સેવા આપી હતી. તાજેતરમાં, ૨૦ મે ૨૦૨૫ ના રોજ, તેમણે ફરીથી મહારાષ્ટ્ર સરકારમાં મંત્રી તરીકે શપથ લીધા છે. ભુજબળ હાલમાં અજિત પવારની આગેવાની હેઠળની એનસીપી સાથે છે, જે મહાયુતિ ગઠબંધન (ભાજપ, શિવસેના અને એનસીપી) નો ભાગ છે. ૨૦૨૪ની વિધાનસભા ચૂંટણીમાં, એનસીપીએ ૪૧ બેઠકો જીતી હતી.
૨૦૧૬માં, ભુજબળની મની લોન્ડરિંગ કેસમાં ધરપકડ કરવામાં આવી હતી, જેના કારણે તેઓ બે વર્ષ સુધી જેલમાં રહ્યા હતા. બાદમાં તેને જામીન મળી ગયા. ૨૦૨૪ માં મહારાષ્ટ્ર કેબિનેટમાં સ્થાન ન મળવાથી ભુજબળ નારાજ હતા અને તેમણે અજિત પવાર પર નિશાન સાધ્યું હતું.
