Gujarat,તા.24
બંગાળની ખાડી તરફથી આવતા ભેજવાળા પવન-વેસ્ટર્ન ડિસ્ટર્બન્સને કારણે અમદાવાદ સહિત રાજ્યના અનેક સ્થળોમાં સતત બીજા દિવસે વાદળછાયું વાતાવરણ યથાવત રહ્યું હતું. હવામાન વિભાગ દ્વારા આગામી 27-28 ડિસેમ્બરના ગુજરાતના 13 જિલ્લામાં 30થી 40 કિલોમીટરની ગતિએ પવન સાથે હળવા વરસાદની આગાહી કરવામાં આવી છે.
હવામાન વિભાગે કરી ઠંડીની આગાહી
હવામાન વિભાગે જણાવ્યું છે કે, આગામી 27-28 ડિસેમ્બરના બનાસકાંઠા-સાબરકાંઠા-અરવલ્લી-પંચમહાલ-દાહોદ-મહીસાગર-છોટા ઉદેપુર-નર્મદા-ડાંગ-નવસારી-વલસાડ-તાપી-કચ્છ-દમણ-દાદરા નગર હવેલીમાં ગાજવીજ સાથે હળવો વરસાદ પડી શકે છે. આ ઉપરાંત લધુતમ તાપમાનમાં બે દિવસ વધારે કોઈ ફેરફાર નહીં થાય, ત્યારબાદ તાપમાનમાં 2-4 ડિગ્રીનો વધારો થશે.
નલિયામાં સૌથી નીચું તાપમાન
ગત રાત્રે નલિયામાં 7.9 ડિગ્રી સાથે સૌથી નીચું તાપમાન નોંધાયું હતું. અમદાવાદમાં 17.8 ડિગ્રી સાથે સરેરાશ લઘુતમ તાપમાનમાં સામાન્ય કરતાં 4.8 ડિગ્રીનો વધારો થયો હતો. આગામી 3 દિવસ અમદાવાદનું તાપમાન વધીને 20 ડિગ્રી સુધી થવાની સંભાવના છે. અમદાવાદમાં 28 ડિસેમ્બર બાદ તાપમાન 13 ડિગ્રીથી નીચે ગગડતાં ઠંડીના જોરમાં ફરી વધારો થશે.
ક્યાં વધારે ઠંડી?
| શહેર | તાપમાન |
| નલિયા | 7.9 |
| ભુજ | 11.2 |
| રાજકોટ | 12.4 |
| પોરબંદર | 12.8 |
| જામનગર | 13.1 |
| અમરેલી | 14.2 |
| કંડલા | 15 |
| દાહોદ | 15.2 |
| ડીસા | 16.3 |
| ગાંધીનગર | 17.1 |
| અમદાવાદ | 17.8 |
| ભાવનગર | 18.8 |
| વડોદરા | 19.8 |
| સુરત | 20.2 |
