Vadodara,
શહેરના બાપોદ પોલીસ સ્ટેશનમાં ફરજ બજાવતો પોલીસ કોન્સ્ટેબલ સોમવારે મોડીરાતે પોણા ત્રણ વાગ્યે મિત્રને અંતિમ ચિઠ્ઠી વોટ્સએપ કરીને ઘરેથી નીકળી જતા દોડધામ મચી ગઇ છે. આ અંગે પાણીગેટ પોલીસે ગૂમ થયાની નોંધ કરી કોન્સ્ટેબલની શોધખોળ હાથ ધરી છે. જોકે, હજીસુધી તેનો કોઇ ભાળ મળી નથી.
મળતી માહિતી અનુસાર, પાણીગેટ વિસ્તારમાં તોડી નાંખવામાં આવેલી સુલેમાની ચાલીવાળી જગ્યામાં બનેલી નવી પોલીસ લાઈનમાં રહેતા અલ્પેશભાઈ ખોડાભાઈ વેંજીયા બાપોદ પોલીસ સ્ટેશનમાં નોકરી કરે છે. બાપોદ પોલીસ સ્ટેશનમાં ફરજ બજાવતો અલ્પેશભાઈ ગઈકાલે રાત્રે સાડા દશ વાગ્યે પોલીસ સ્ટેશનથી ઘરે આવ્યો હતો.ત્યારબાદ મોડીરાતે મિત્ર પ્રવિણને એક અંતિમ ચિઠ્ઠી વોટ્સએપ કરીને તે ઘર છોડીને જતો રહ્યો હતો. પરિવારે શોધખોળ હાથ ધરી હતી પરંતુ તેનો મોબાઇલ પણ સ્વીચ ઓફ બતાવતો હતો. તેણે ચિઠ્ઠીમાં લખ્યું હતું કે, હું મારા ભાઇ ભમરના લગ્નમાં ઘરે આવ્યો અને દાદાને મળ્યો ત્યારે તેમણે મને ઇશારો કર્યો હતો કે, હવે તારે મારી પાસે આવવું પડશે પણ મેં ના પાડી તેમની પાસે થોડો સમય માંગ્યો હતો. તેમણે મને આપેલું માદળિયું મેં પાછું આપી દીધું હતું. તેમાં જ મારૃં અસ્તિત્વ હતું. હું તેમની પાસે નહીં જઉં તો મને મજબૂર કરશે. હું જેઓને પ્રેમ કરૃં છું અને જેઓના કારણે અહીંયા રહેવા માંગુ છું. તેઓથી મને દૂર કરવા તેઓનો જીવ પણ લઇ શકે છે. જેથી, હું જાતે જ મારા દાદા પાસે જઉં છું. હું દુનિયા છોડીને મારા દાદા પાસે જઉં છું. મારૃં શરીર તમને કોઇને મળવાનું નથી. મારા શરીર પર મારા પરિવાર કે અન્ય કોઇનો હક્ક નથી. ખાલી મારા દાદાનો અધિકાર છે. હું આ શરીર છોડીને જઉં છું. છેલ્લે ચિઠ્ઠીમાં તેણે નેક્સ્ટ ટાઇમ અને મોબાઇલ નંબર લખી સહી કરી હતી.
