Washington,તા.4
ડોનાલ્ડ ટ્રમ્પ મોટા-મોટા વાયદા આપીને બીજીવાર પ્રેસિડેન્ટ બન્યા હતા પરંતુ તેમના અત્યારસુધીના કાર્યકાળમાં તેમણે આપેલા વચનો હથેળીમાં બતાવાયેલા ચાંદ જેવા પૂરવાર થયા હોય તેવું અમેરિકન્સને લાગી રહ્યું છે. દ્વારા અમેરિકન્સનો મૂડ જાણવા માટે કરવામાં આવેલા એક પોલમાં એવું જાણવા મળ્યું છે કે, 66 ટકા અમેરિકન્સને એવું લાગે છે કે દેશ ખોટી દિશામાં આગળ વધી રહ્યો છે અને વધી રહેલી મોંઘવારી માટે 59 ટકા અમેરિકન્સે ટ્રમ્પ અને તેમની નીતિઓને જવાબદાર ઠેરવ્યા છે.
આ ઉપરાંત અડધાથી વધુ અમેરિકન્સનું એવું માનવું છે કે, ટ્રમ્પના પ્રેસિડેન્ટ બન્યા બાદ ઈકોનોમીની હાલત બદતર થઈ ગઈ છે, એટલું જ નહીં બહુમતી અમેરિકન્સ એવું પણ માની રહ્યા છે કે પ્રેસિડેન્ટ ટ્રમ્પની સાથે-સાથે ડેમોક્રેટ્સ અને રિપબ્લિકન્સને હાલ દેશ કઈ સ્થિતિમાંથી પસાર થઈ રહ્યો છે તેની કશીય સમજ નથી. આર્થિક સ્થિતિ ઉપરાંત સતત લાંબા ખેંચાઈ રહેલા શટડાઉનને કારણે પણ અમેરિકન્સ ચિંતિત છે.
આ સર્વેમાં ડેમોક્રેટિક પાર્ટી ઉપરાંત રિપબ્લિકન પાર્ટીના સપોર્ટર હોય તેવા લોકો તેમજ ઈન્ડિપેન્ડન્ટ્સને પણ આવરી લેવામાં આવ્યા હતા, તેમાં ભાગ લેનારા 95 ટકા ડેમોક્રેટિક પાર્ટીના સપોર્ટર્સે દેશ ખોટી દિશામાં આગળ વધી રહ્યો હોવાનું જણાવ્યું હતું.
જ્યારે આમ માનનારા ઈન્ડિપેન્ડન્ટ્સની સંખ્યા 77 ટકા હતી અને 29 ટકા રિપબ્લિકન્સનું પણ કંઈક આવું જ માનવું હતું. નવાઈની વાત એ છે કે વ્હાઈટ અમેરિકન્સ કરતાં હિસ્પેનિક, બ્લેક અને એશિયન્સમાં ટ્રમ્પ સામે વધારે નારાજગી જોવા મળી હતી.
મતલબ કે ટ્રમ્પની પોલિસી સાથે સહમત ના હોય તેવા એશિયન્સ અને હિસ્પેનિક્સનું પ્રમાણ 71 ટકા જેટલું થાય છે. જોકે, મહત્વની વાત એ પણ છે કે હાલ ભલે 66 ટકા જેટલા લોકો આમ માનતા હોય પરંતુ નવેમ્બર 2024માં જ્યારે અમેરિકામાં પ્રેસિડેન્શિયલ ઈલેક્શનની તૈયારી હતી.
ત્યારે આમ માનનારા લોકોનું પ્રમાણ 75 ટકા પર હતું અને સરકાર બદલાયા બાદ પણ તેમાં કોઈ ખાસ ઘટાડો નથી થયો, મતલબ કે ટ્રમ્પ પ્રત્યે લોકોને જે આશા હતી તે કદાચ ઠગારી નિવડી છે.
મોંઘવારી માટે ટ્રમ્પને જવાબદાર માનતા હોય તેવા લોકોનું પ્રમાણ 60 ટકા જેટલું થાય છે જ્યારે એટલા જ લોકો ટ્રમ્પ ટેરિફ, ઈકોનોમી અને ફેડરલ ગવર્મેન્ટ સહિતના જે ઈશ્યૂને જે રીતે હેન્ડલ કરી રહ્યા છે તેનાથી નારાજ છે.
આ ઉપરાંત 64 ટકા લોકોનું એવું પણ માનવું છે કે, ટ્રમ્પ સર્વસત્તાધીશ બનવા માટે પ્રયાસ કરી રહ્યા છે. ટ્રમ્પ સામે ભલે લોકોમાં નારાજગી વધી રહી હોય પરંતુ ડેમોક્રેટિક પાર્ટીની હાલત પણ કંઈ ખાસ સારી નથી.
ડેમોક્રેટ્સને લોકોની સ્થિતિનો કોઈ અંદાજ નથી તેવું માનનારા લોકોનું પ્રમાણ 68 ટકા થાય છે, જે દર્શાવે છે કે ટ્રમ્પ સામેની નારાજગીનો ડેમોક્રેટ્સને હાલ પૂરતો કોઈ ફાયદો થતો નથી દેખાઈ રહ્યો.
અમેરિકાની ઓળખ જગત જમાદાર તરીકેની રહી છે પરંતુ 48 ટકા અમેરિકન્સનું માનવું છે કે, ટ્રમ્પના શાસનમાં અમેરિકાની લીડરશિપ નબળી પડી છે જ્યારે 33 ટકાનું માનવું છે કે દુનિયામાં અમેરિકાના માન-સમ્માન વધ્યા છે.
આવી જ હાલત ઈકોનોમીની પણ છે, આ સરવેમાં ભાગ લેનારા 52 ટકા અમેરિકન્સનું માનવું હતું કે ટ્રમ્પના પ્રેસિડેન્ટ બન્યા બાદ ઈકોનોમી નબળી પડી છે જ્યારે 27 ટકા માને છે કે ઈકોનોમી ઈમ્પ્રુવ થઈ છે.
