New Delhi,તા.20
એક તરફ દેશમાં ફુગાવાની સ્થિતિના કારણે હવે રિઝર્વ બેન્ક ઓફ ઈન્ડીયા ફરી વ્યાજદર વધારી રહી છે તથા આગામી દિવસોમાં બેન્ક ધિરાણ વધુ મોંઘા બનશે તો પર્સનલ લોનથી ઓટો તથા હાઉસીંગ લોન લેનારની મુશ્કેલીઓ વધી શકે છે.
વ્યાજદર વધતા બેન્કો માસિક હપ્તાની રકમ વધારશે તથા લોનની અવધી પણ વધી શકે છે તે સમયે નોન બેન્કીંગ ફાયનાન્સ કંપનીઓ માટે મુશ્કેલ સ્થિતિ વધુ મુશ્કેલ બની શકે છે. દેશમાં અલનીનોની સ્થિતિથી ગ્રામીણ આવક પર અસર થશે અને કૃષી સહિતની આવક ઘટશે તેવો અંદાજ છે જેના કારણે અગાઉ મોટા પર્સનલ ફાયનાન્સ લેનાર ડિફોલ્ટ થવાની શકયતા વધુ છે.
ખાસ કરીને નોન બેન્કીંગ ફાયનાન્સ કંપનીઓ પાસેથી રૂા.7-10 લાખ લોન લેનારમાં ડિફોલ્ટ વધવા લાગ્યા છે. તેના કારણે હવે કંપનીઓ તેના નવા ધિરાણના નિયમો પણ વધુ આકરા બનાવી રહી છે. એક રિપોર્ટ મુજબ પર્સનલ સહિતના ધિરાણ લેનારમાં ડિફોલ્ટર વધવા લાગતા નોન બેન્કીંગ ફાયનાન્સ કંપનીઓએ ધિરાણ મંજુર કરવામાં બ્રેક મારી દીધી છે.
હવે મંજુર ધિરાણનો દર 50%થી નીચે આવી ગયો છે તો તેની સાથે વસુલાત પ્રક્રિયા વધુ તેજ બનાવવામાં આવી છે તથા જરૂર પડે કાનુની કાર્યવાહી પણ કરવા સૂચના આપવામાં આવી છે.
સપ્ટેમ્બર માસમાં એનબીએફસીના કુલ એનપીએ 2.17% છે જે એક વર્ષ પુર્વે 1.59% હતું. એક એનબીએફસી એપ્ટસ એ તેના રૂા.90 કરોડના ધિરાણ વસુલવા એસેટસ રિક્રન્ટ્રકશન કંપનીને તે ધિરાણ વેચી દીધુ છે.

