Mumbai,તા.૨૧
ઇંગ્લેન્ડ અને ભારત વચ્ચે લીડ્સમાં પ્રથમ ટેસ્ટ મેચ રમાઈ રહી છે. આ ટેસ્ટ મેચના પહેલા દિવસે ભારત તરફથી બે બેટ્સમેનોએ સદી ફટકારી. પહેલી સદી ઓપનર યશસ્વી જયસ્વાલના બેટમાંથી આવી, જ્યારે બીજી સદી કેપ્ટન શુભમન ગિલે ફટકારી. બંનેએ સદી ફટકારીને એક એવી સિદ્ધિ મેળવી, જે ઇંગ્લેન્ડની ધરતી પર આ પહેલાં કોઈ ભારતીય કરી શક્યું ન હતું. યશસ્વી જયસ્વાલ અને શુભમન ગિલની જોડી ઇંગ્લેન્ડની ધરતી પર ટેસ્ટ મેચના પહેલા દિવસે સદી ફટકારનારી પ્રથમ ભારતીય જોડી બની ગઈ છે.
તમને જણાવી દઈએ કે ભારતીય ટેસ્ટ ક્રિકેટના ઇતિહાસમાં આ ફક્ત ત્રીજી વખત છે જ્યારે બે ભારતીય બેટ્સમેનોએ વિદેશી ધરતી પર ટેસ્ટ મેચના પહેલા દિવસે સદી ફટકારી હોય. આ પહેલા આ સિદ્ધિ સચિન તેંડુલકર અને વીરેન્દ્ર સેહવાગે ૨૦૦૧માં મેળવી હતી. બંનેએ દક્ષિણ આફ્રિકા સામેની ટેસ્ટ મેચના પહેલા દિવસે સદી ફટકારી હતી. ત્યારબાદ ૨૦૧૭માં શિખર ધવન અને ચેતેશ્વર પૂજારાની જોડીએ આ સિદ્ધિ મેળવી હતી. તેમણે ગાલેમાં શ્રીલંકા સામેની ટેસ્ટ મેચના પહેલા દિવસે સદી ફટકારી હતી.
વિદેશમાં ટેસ્ટ મેચના પહેલા દિવસે સદી ફટકારનારા બે ભારતીય બેટ્સમેન
સચિન તેંડુલકર અને વીરેન્દ્ર સેહવાગ વિરુદ્ધ દક્ષિણ આફ્રિકા, બ્લૂમફોન્ટેન ૨૦૦૧
શિખર ધવન અને ચેતેશ્વર પૂજારા વિરુદ્ધ શ્રીલંકા, ગેલ ૨૦૧૭
યશસ્વી જયસ્વાલ અને શુભમન ગિલ વિરુદ્ધ ઈંગ્લેન્ડ, હેડિંગલી ૨૦૨૫
ભારત અને ઈંગ્લેન્ડ વચ્ચે રમાયેલી પ્રથમ ટેસ્ટ મેચના પહેલા દિવસની વાત કરીએ તો, ઈંગ્લેન્ડે ટોસ જીતીને પહેલા બોલિંગ કરવાનો નિર્ણય લીધો. કેપ્ટન સ્ટોક્સનો આ નિર્ણય ખોટો સાબિત થયો. યશસ્વી જયસ્વાલ અને કેએલ રાહુલની જોડીએ ટીમ ઈન્ડિયાને શાનદાર શરૂઆત અપાવી. બંને વચ્ચે પ્રથમ વિકેટ માટે ૯૧ રનની ભાગીદારી થઈ. કેએલ રાહુલ ૭૮ બોલમાં ૪૨ રન બનાવીને આઉટ થયો. તેના આઉટ થયા પછી, ત્રીજા નંબર પર સાઈ સુદર્શન બેટિંગ કરવા આવ્યો. આ તેની ડેબ્યૂ મેચ હતી જ્યાં તે ખાતું ખોલ્યા વિના ૪ બોલમાં આઉટ થઈ ગયો.
આ પછી યશસ્વી જયસ્વાલે સદી ફટકારી. શુભમન ગિલ પણ કેપ્ટન તરીકેની પોતાની પહેલી ટેસ્ટમાં સદી ફટકારવામાં સફળ રહ્યો. જયસ્વાલ ૧૫૯ બોલમાં ૧૦૧ રન બનાવીને આઉટ થયો. પાંચમા નંબરે બેટિંગ કરવા આવેલા ઋષભ પંતે ગિલને સાથ આપ્યો. ચોથી વિકેટ માટે બંને વચ્ચે ૧૩૮ રનની ભાગીદારી થઈ છે. ગિલ ૧૨૭ અને ઋષભ પંત ૩૫ રન પર અણનમ છે. હવે આ બંને બેટ્સમેન મળીને ટીમ ઈન્ડિયાને મોટા સ્કોર સુધી લઈ જવા માંગશે.
