(નયના દવે દ્વારા)
Jamnagar તા.૨૭
Jamnagar જિલ્લામાં નશીલા પદાર્થોના વેપાર સામે હાથ ધરાયેલા ‘‘નો ડ્રગ્સ ઇન જામનગર’’ અભિયાન અંતર્ગત એસઓજી અને પંચકોષી એ ડિવિઝન પોલીસની સંયુક્ત ટીમે ફલ્લા ગામ નજીકથી ૨ કિલો ૯૦૦ ગ્રામ ગાંજાના જથ્થા સાથે એક શખ્સને ઝડપી પાડી રૂ. ૧.૫૦ લાખનો મુદ્દામાલ કબજે કર્યો છે.રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય દ્વારા નશીલા પદાર્થોના વેપાર પર રોક લગાવવા સૂચના આપવામાં આવી હતી. જે અનુસંધાને જામનગર જિલ્લા પોલીસ અધિક્ષક ડો. રવિ મોહન સૈનીના માર્ગદર્શન હેઠળ જિલ્લામાં નશાખોરી અને નશીલા પદાર્થોના કારોબાર સામે અસરકારક કાર્યવાહી કરવા માટે ‘‘નો ડ્રગ્સ ઇન જામનગર’’ અભિયાન હાથ ધરવામાં આવ્યું છે.
એસઓજીના ઇન્ચાર્જ પોલીસ ઇન્સ્પેક્ટર વી.બી. ચૌધરી તથા પંચકોષી એ ડિવિઝન પોલીસ સ્ટેશનના પોલીસ ઇન્સ્પેક્ટર આઈ.એ. ઘાસુરાના માર્ગદર્શન હેઠળ એસઓજી અને પંચકોષી એ ડિવિઝન પોલીસનો સ્ટાફ ખીજડિયા બાયપાસ ખાતે વાહન ચેકિંગ કરી રહ્યો હતો.
દરમિયાન પોલીસને બાતમી મળી હતી કે, હાજી ઉર્ફે દુનો આદમભાઈ ખફી, રહે. સુમરા ચાલી, ઉનની કંદોરી પાસે, જામનગર, ગાંજાનો જથ્થો લઈને રાજકોટ તરફથી સફેદ રંગની ઈકો કાર નં. જી.જે. ૧૦ ડી.ઇ. ૫૪૫૫ માં જામનગર તરફ આવી રહ્યો છે.
બાતમીના આધારે પોલીસ ટીમે ફલ્લા ગામથી આગળ રુદ્રાક્ષ હોટલ નજીક હાઇવે રોડ પર વોચ ગોઠવી હતી. જ્યાંથી બાતમી મુજબના ૨૬ વર્ષીય હાજી ઉર્ફે દુનો આદમભાઈ ખફીને ઝડપી લેવામાં આવ્યો હતો. તેની પાસેથી ૨ કિલો ૯૦૦ ગ્રામ ગાંજો તથા એક મોબાઇલ ફોન મળી કુલ રૂ. ૧,૫૦,૦૦૦નો મુદ્દામાલ કબજે કરવામાં આવ્યો હતો.આ મામલે આરોપી સામે પંચકોષી એ ડિવિઝન પોલીસ સ્ટેશનમાં એનડીપીએસ એક્ટની કલમ ૮(સી), ૨૦(બી)(૨)(બી) અને ૨૯ મુજબ ગુનો નોંધી વધુ તપાસ અને કાર્યવાહી હાથ ધરવામાં આવી છે.કબજે કરાયેલ મુદ્દામાલમાં ગાંજો ૨ કિલો ૯૦૦ ગ્રામ રૂ. ૧,૪૫,૦૦૦, એક મોબાઇલ ફોન રૂ. ૫,૦૦૦ મળી કુલ મુદ્દામાલ રૂ. ૧,૫૦,૦૦૦ નો સમાવેશ થાય છે.આ કાર્યવાહી એસઓજીના ઇન્ચાર્જ પોલીસ ઇન્સ્પેક્ટર શ્રી વી.બી. ચૌધરી, પંચકોષી એ ડિવિઝન પોલીસ સ્ટેશનના પોલીસ ઇન્સ્પેક્ટર શ્રી આઈ.એ. ઘાસુરા તેમજ એસઓજી અને પંચ એ ડિવિઝન પોલીસ સ્ટાફ દ્વારા કરવામાં આવી હતી.
